2021 թվականի 1-ին կիսամյակի ընթացքում ՀՀ ոստիկանության ներքին անվտանգության վարչությունում կատարվել են 647 ծառայողական քննություններ և ուսումնասիրություններ:
Այս մասին տեղեկանում ենք ոստիկանությունից:
Կատարված ծառայողական քննությունների արդյունքներով ոստիկանության ծառայողների նկատմամբ կիրառվել են 55 կարգապահական տույժեր, այդ թվում՝
– հայտարարվել է «Նկատողություն»` 34,
– հայտարարվել է «Խիստ նկատողություն»` 6,
– ազատվել են ոստիկանությունում ծառայությունից` 15:
ՀՀ ոստիկանության ծառայողների կողմից թույլ տրված օրինախախտումների փաստերով ներքին անվտանգության վարչության կողմից նախապատրաստվել և նախաքննական մարմինների քննարկմանն են ուղարկվել ծառայողական քննությունների 22 նյութեր: Դրանցից.
– 5-ով նյութերը քննարկման փուլում են,
– 5-ով քրեական գործ հարուցելը մերժվել է (1-ը՝ բողոքի, 4-ը՝ հանցակազմի բացակայության հիմքերով),
– 12-ով հարուցվել են քրեական գործեր, որոնցից՝
– 2-ը կարճվել են /հանցակազմի բացակայության հիմքով/,
– 9-ը գտնվում են նախաքննության փուլում,
– 1-ն ուղարկվել է դատարան և գտնվում է դատաքննության փուլում։
2021 թվականի 1-ին կիսամյակի ընթացքում ՀՀ ոստիկանությունում հրավիրվել է կարգապահական հանձնաժողովի 2 նիստ, որոնց ընթացքում քննարկվել է ոստիկանության 12 ծառայողի վերաբերյալ իրականացված ծառայողական քննությունների 11 նյութ:
Կարգապահական հանձնաժողովի որոշմամբ ՀՀ ոստիկանության պետի հրամաններով ոստիկանության 12 ծառայողի նկատմամբ կիրառվել են կարգապահական տույժեր, մասնավորապես՝ 2 ծառայողի հայտարարվել է «Խիստ նկատողություն», իսկ 10-ն ազատվել են ՀՀ ոստիկանությունում ծառայությունից:
