Քրեական մասնագիտացման դատավորների թվակազմն ավելացվում է։ Այս մասին կառավարությունը որոշում ընդունցեց հուլիսի 8-ի նիստին։

Որոշման համաձայն՝ Երևան քաղաքի առաջին ատյանի ընդհանուր իրավասության դատարանի քրեական մասնագիտացման դատավորների թվակազմը նախատեսվում է ավելացնել 8 դատավորով, 1-ական դատավորներով մարզերի առաջին ատյանի ընդհանուր իրավասության դատարանի քրեական մասնագիտացման դատավորների թվակազմը, 3 դատավորով՝ ՀՀ վերաքննիչ քրեական դատարանի դատավորների թվակազմը: Գործադիրի որոշմամբ նախատեսվում է ապահովել նաև 20 դատավորի ավելացման անհրաժեշտ պահպանման ծախսերը։

Նիկոլ Փաշինյանը, անդրադառանալով որոշմանը, նշել է, որ դատավորների թվակազմի ավելացումը պետք է դիտարկել նաև որպես դատական համակարգում բովանդակային բարեփոխումների միջոց: «Ինչպես Պարեկային ոստիկանությունում, գալիս են մարդիկ, ովքեր նախկինում ոստիկանության հետ առնչություն չեն ունեցել՝ իրենց հետ բերելով նոր հայացք, նոր մոտեցում, բնականաբար, ոստիկանությունում արդեն առկա լավագույն փորձը հաշվի առնելով, նույն արդյունքը մենք հետապնդում ենք նաև դատական համակարգում: Հույս ունենք, որ այս լրացումներով, համալրումներով մենք կուժեղացնենք դատական համակարգում առկա լավագույն փորձը, մյուս կողմից՝ նոր թարմ հայացք, թարմ ուժեր կներգրավվենք դատական համակարգ՝ ստանալով, ի վերջո, պայմանական ասած, մեր երազանքների դատական համակարգը, որի դիրքորոշումները հենց իրենց բնույթով և էությամբ, իրենց ծագմամբ կհամարվեն արդարության և արդարադատության մարմնավորում և դրսևորում: Սա ամենակարևոր նպատակն է, որն մենք բոլորս հետապնդում ենք, ուստի, կարծում եմ, շատ կարևոր որոշում է՝ հաշվի առնելով նաև այն ուղեկցող ընթացակարգերը, որոնք մենք վերջին տարիներին սահմանել ենք նոր դատավորների և ընդհանրապես պաշտոնյաների նշանակման համար»,-ասել է վարչապետի պաշտոնակատարը:

Արդարադատության նախարարի պաշտոնակատար Ռուստամ Բադասյանն այս մասին նշում է․ «Կյանքի է կոչվում մինչդատական քրեական վարույթի նկատմամբ դատական վերահսկողություն (կալանքի միջնորդություններ, ձերբակալման օրինաչափության ստուգում, խուզարկության թույլտվություն) իրականացնող և օպերատիվ հետախուզական միջոցառումներ իրականացնելու վերաբերյալ միջնորդություններ քննող մասնագիտացված առանձին դատավորներ ունենալու մեր նախաձեռնությունը։

Կառավարության այսօրվա որոշմամբ համաձայնություն տրվեց Բարձրագույն դատական խորհրդի առաջարկությանը, որի արդյունքում Բարձրագույն դատական խորհրդի կողմից Երևան քաղաքի առաջին ատյանի ընդհանուր իրավասության դատարանում քրեական մասնագիտացման դատավորների թվակազմը կավելացվի 8-ով, մարզերում` 9-ով, վերաքննիչ քրեական դատարանում՝ 3-ով:

Հիշեցնեմ, որ մեր այս օրենսդրական նախաձեռնությունը ԱԺ կողմից ընդունվել էր դեռևս այս տարվա փետրվարին: Նախագահն այն չէր ստորագրել և դիմել էր ՀՀ Սահմանադրական դատարան` մի շարք դրույթների սահմանադրականության վիճարկման պահանջով, իսկ օրեր առաջ Սահմանադրական դատարանը օրենքը ճանաչեց Սահմանադրությանը համապատասխանող»։