Ավստրիայի կանցլեր Սեբաստիան Կուրցը հայտարարել է, որ Ավստրիայի համար մեծ պատիվ կլինի, եթե Ռուսաստանի նախագահ Վլադիմիր Պուտինը և Ամերիկայի Միացյալ Նահանգների նախագահ Ջո Բայդենն իրենց հանդիպումը Վիեննայում անցկացնեն:
Այս մասին հայտնում է ՌԻԱ Նովոստին։
Առաջարկի մասին կանցլերը նշել է ավստրիական Pioneer հարթակին տված հարցազրույցում՝ ընգծելով, որ Ավստրիան երկու կողմերի հետ կապի մեջ է։
«Կան չեզոք երկրներ, որոնք ընտրվում են երկխոսության անցկացման համար: Մենք արդեն կապի մեջ ենք ռուսական և ամերիկյան կողմերի հետ: Եթե նման հանդիպում իրոք կայանա, ապա մենք անչափ ուրախ կլինենք, եթե այն անցկացվի Ավստրիայում»,- ասել է Սեբաստիան Կուրցը։
Ավստրիայի կանցլերը նաև նշել է, որ իրենց երկիրը չի գերագնահատում իր դերը և միջնորդի դեր չի ստանձնում այս հարցում:
