Նախագահ Ռեջեփ Թայիփ Էրդողանը ուրբաթօրյա աղոթքից հետո լրագրողների հետ զրույցում հայտարարություններ արեց օրակարգային հարցերի վերաբերյալ, փոխանցում է Sputnik-ը։
Գնահատելով Հայաստանում տեղի ունեցածը ՝ Էրդողանն ասաց. «Մենք դեմ ենք բոլոր տեսակի հեղաշրջումներին, մեզ համար հեղաշրջումներն անընդունելի են։ Զինվորականները չպետք է ձեռնարկեն հեղաշրջում։ Կառավարության փոփոխություն պետք է տեղի ունենա Հայաստանի ժողովրդի կողմից և այդ հարցը պետք է լուծի հայ ժողովուրդը»։
Հիշեցնենք, որ փետրվարի 25-ին ՀՀ Զինված ուժերի գլխավոր շտաբը հայտարարություն տարածեց, որով պահանջում էր վարչապետ Նիկոլ Փաշինյանի հրաժարականը։
Վարչապետ Նիկոլ Փաշինյանն արագ արձագանքեց հայտարարությանը։
«Գլխավոր շտաբի հայտարարությունը համարում եմ ռազմական հեղաշրջման փորձ: Մեր բոլոր կողմնակիցներին հենց հիմա հրավիրում եմ Հանրապետության Հրապարակ»։
Ընդդիմությունը փակել է Բաղրամյան պողոտան և շարունակում է պահանջել Նիկոլ Փաշինյանի հրաժարականը։
