Մոսկվայի «Շերեմետևո» օդանավակայանում Լոս Անջելես-Մոսկվա չվերթի ՀՀ քաղաքացի ուղևորուհուց 40,000 դոլար գողանալու կասկածանքով երևանցի ամուսիններ են ձերբակալվել: Այս մասին հայտնում է ՏԱՍՍ-ը։
Գումարը թաքցրել էին մարզակոշիկներում և բաճկոնի ծոցագրպանում և փորձել հեռանալ:
Օդանավակայանում ՌԴ ՆԳՆ գծային վարչության հերթապահ բաժնի աշխատակիցների մոտ կասկածներ է հարուցել ամուսնական զույգը Երևանից, որոնք նստած են եղել տուժողի կողքին:
«Նրանց բերման են ենթարկել և տեղափոխել հերթապահ մաս: Կինը դժվարությամբ էր շարժվում, բողոքելով առողջական վիճակից, սակայն, պարզվել է, որ նրան նորմալ քայլել խանգարում էին մարզակոշիկներում թաքցված թղթադրամները: Գումարի մյուս մասը հայտնաբերվել է նրա ամուսնու բաճկոնի ծոցագրպանից»,-նշել են օդանավակայանից:
