Ոստիկանության պետի ժամանակավոր պաշտոնակատար Արման Սարգսյանը հունվարի 15-ին հրաման է ստորագրել, ոստիկանությունում քաղաքացիների ընդունելության կազմակերպման կարգը հաստատելու մասին:
Քաղաքացիները ոստիկանության պետի, նրա տեղակալների, ոստիկանության գործավարության և գաղտնիության ռեժիմի ապահովման ու կադրային քաղաքականության վարչությունների պետերի մոտ ընդունելության կներկայանան ոստիկանության ընդունարան:
Ընդունելություն հայցող քաղաքացիները կգրանցվեն քաղաքացիների ընդունելության հաշվառման մատյանում՝ անձը հաստատող փաստաթղթի հիման վրա: Քաղաքացիներն ընդունելության կարող են գրանցվել ինչպես անձամբ ներկայանալու, այնպես էլ այլ եղանակներով՝ հեռախոսազանգ, դիմում և այլն:
Ծառայողը քաղաքացուն կգրանցի նախապես ճշտելով բարձրացված հարցի բնույթը: Քաղաքացուն կհայտնի նաև ընդունելության օրը ժամը և այն իրականացնող պաշտոնատար անձի տվյալները:
Ընդունելության հետաձգման դեպքում գրանցող ծառայողը նախապես կտեղեկացնի քաղաքացիներին:
Մանկահասակ երեխաների հետ ներկայացած քաղաքացիների, վետերանների, 1-ին և 2-րդ խմբի հաշմանդամների, հղի կանանց ընդունելությունը կիրականացվի արտահերթ:
