Առողջապահական և աշխատանքի տեսչական մարմնի ղեկավար Հակոբ Ավագյանը շնորհակալագրեր է հանձնել անցնող տարում ԱԱՏՄ-ի աշխատանքը համակողմանի, բարեխիղճ և ամենաակտիվը լուսաբանած 3 լրատվամիջոցի։
Վերջիններիս ընտրությունը հիմնավորվել է լրատվահոսքի մոնիթորինգի արդյունքներով, ըստ որոնց՝ անցնող տարվա ընթացքում ԱԱՏՄ-ին առնչվող տեղեկատվություն ամենաշատը հաղորդել են Իրավաբան․net, ապա՝ Lragir․am լրատվական կայքերը։
Տեսչական մարմնի գործունեությունը 2019 թվականի ընթացքում լուսաբանելիս բարեխիղճ և վստահելի մոտեցում ցուցաբերելու համար շնորհակալագրի է արժանացել նաեւ «Արմենպրես» լրատվական գործակալությունը։
ԱԱՏՄ ղեկավար Հակոբ Ավագյանը, շնորհակալություն հայտնելով արդյունավետ համագործակցության համար, հույս է հայտնել, որ եկող տարվա համար ծրագրված ծանր ու պատասխանատու աշխատանքը եւս կլինի լրատվամիջոցների ուշադրության կենտրոնում։
«Շնորհակալ կլինենք թե արվող աշխատանքի արդյունքները նկատելու, եւ թե քննադատական դիտարկումների համար, քանի որ դրանք որոշ դեպքերում կարող են օգտակար լինել տարբեր խնդիրների լուծմանը հասնելու համար»,-նկատել է Ավագյանը։
Նշված ԶԼՄ-ների հետ հարցազրույցում Ավագյանը նաեւ անդրադարձել է 2019-ի ընթացքում արձանագրված մի շարք կարեւոր ցուցանիշերի՝ նկատելով, որ հարուցված վարչական վարույթների գերակշիռ մասը եղել է հիգիենիկ, սանիտարահիգիենիկ և հակահամաճարակային վերահսկողության մասով՝ 1650 վարույթից՝ 1031-ը։
Նրա փոխանցմամբ՝ Առողջապահական եւ աշխատանքի տեսչական մարմինը եկող տարի առաջին անգամ առաջնորդվելու է ստուգումների ծրագրով, որում ընդգրկված է շուրջ 200 կազմակերպություն։
ԱԱՏՄ ղեկավար Հակոբ Ավագյանը և «Արմենպես» լրատվական գործակալության լրագրող Աննա Գրիգորյանը
ԱԱՏՄ ղեկավար Հակոբ Ավագյանը և Lragir․am լրատվական կայքի լրագրող Ռոզա Հովհաննիսյանը
