Ազգային Ժողովի պատգամավոր Արթուր Դավթյանը ներկայացրել է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին նախագիծը:
Նախագծով նախատեսվում է փոփոխել պետական պաշտոն և պետական ծառայության պաշտոն զբաղեցնող անձանց հավելավճարները և դրանց հաշվարկման կարգը:
Կոչման համար հավելավճարը կտրվի նաև դատական կարգադրիչներին, հարկային, մաքսային ծառայողներին:
Ընդ որում՝ հարկային և մաքսային ծառայողներին հավելավճարը տրվում է միայն առավել բարձր հավելավճար նախատեսող կոչման համար, իսկ նույն չափով հավելավճար նախատեսող կոչումների համար տրվելու է այդ կոչումներից միայն մեկի համար:
Տվյալ մարմնում ամենացածր կոչման համար հավելավճարը սահմանվում է պաշտոնային դրույքաչափի 3 տոկոսի չափով, իսկ դրան հաջորդող յուրաքանչյուր հերթական ավելի բարձր կոչման համար հավելավճարի չափը աճում է մեկ տոկոսով:
Հեղինակը նշում է, որ օրենքում համապատասխան փոփոխությունները կատարելուց հետո կապահովվեն պետական ծառայողների վարձատրության սկզբունքների հիմնական պահանջները:
Դատական կարգադրիչների ծառայության «Աշխատողների աշխատավարձեր և հավելավճարներ» ֆոնդը կավելանա ամսական 5 միլիոն 584 հազար դրամով, իսկ տարեկան կտրվածքով՝ 73 միլիոն 321 հազար դրամով:
