Սեպտեմբերի 1-ից Երևանի նախադպրոցական հաստատություններում կգործի երկարօրյա ծառայություն, ինչը մեծապես կթեթևացնի աշխատող ծնողների հոգսը: Այդ մասին հայտնել է Երևանի ավագանու «Իմ քայլը» խմբակցության անդամ Աննա Ջավախյանը ֆեյսբուքյան «Մանկապարտեզները և երեխաները» խմբում:
Պետական մանկապարտեզներում երեխային պետք է վերցնել գոնե 17.00-17.30-ին, իսկ աշխատանքային ժամը ավարտվում է 18.00-ին, և դեռ անհրաժեշտ է հասնել մանկապարտեզ։
«Սեպտեմբերից Երևանի բոլոր մանկապարտեզները կմատուցեն երկարացված օրվա ծառայություն, դա կլինի վճարովի՝ ամսական 5000 դրամ: Խումբը բացվելու միակ նախապայմանն այն է, որ ամբողջ մանկապարտեզից առնվազն 5 երեխայի ծնող դիմի։ Երկարօրյա խմբերը կաշխատեն 17։30-19։00»,- ասվում է գրառման մեջ: Երկարօրյա ծառայության մեջ սնունդ չի նախատեսվում:
