Երևանի քաղաքապետ Հայկ Մարությանը փետրվարի 7-ին որոշում է ստորագրել, որի համաձայն իմնադրման միջոցով ստեղծել «Թափառող կենդանիների վնասազերծման կենտրոն» համայնքային ոչ առևտրային կազմակերպություն:
Որոշմամբ սահմանվում է, որ կազմակերպության գործունեության առարկան և նպատակներն են՝
- ա) մշակել և իրականացնել Երևան քաղաքում թափառող կենդանիների վնասազերծման և դրանց թվաքանակի կանոնակարգման համալիր ծրագիր,
- բ) իրականացնել Երևան քաղաքում առկա թափառող շների վիճակագրության ուսումնասիրություններ, համարակալման, քարտեզագրման, նույնականացման և խնամքի աշխատանքներ,
- գ) համագործակցել ոլորտում մասնագիտացած միջազգային, տեղական մասնագիտական և հասարակական կազմակերպությունների հետ, համատեղ մշակել և իրականացնել թափառող կենդանիների հիմնախնդիրների լուծման տարաբնույթ ծրագրեր,
- դ) իրականացնել Երևան քաղաքում առկա թափառող կենդանիների անասնաբուժական ծառայություններ (ախտորոշումներ, պատվաստումներ, բուժումներ, վիրահատություններ, խնամք և այլն),
ե) իրականացնել թափառող կենդանիների խնդիրների լուծմանը նպաստող կրթական և իրազեկման աշխատանքներ:
Նշվում է նաև, որ կազմակերպությանը սեփականության իրավունքով հանձնվում է 100 000 (հարյուր հազար) ՀՀ դրամ:
Կազմակերպությանը թույլատրվել է նաև իրականացնել ձեռնարկատիրական գործունեության հետևյալ տեսակները.
- իրականացնել կենդանիների վնասազերծման և դրանց թվաքանակի կանոնակարգման համալիր ծրագրեր,
- իրականացնել կենդանիների վիճակագրության ուսումնասիրություններ, համարակալման, քարտեզագրման, նույնականացման և խնամքի աշխատանքներ,
- իրականացնել կենդանիների անասնաբուժական ծառայություններ (ախտորոշումներ, պատվաստումներ, բուժումներ, վիրահատություններ, խնամք և այլն),
- իրականացնել կենդանիների խնդիրների լուծմանը նպաստող կրթական և իրազեկման աշխատանքներ:
Նույն որոշմամբ հանձնարարվել է Երևանի քաղաքապետարանի աշխատակազմի բնապահպանության վարչության պետին` օրենսդրությամբ սահմանված կարգով նախապատրաստել Կազմակերպության կանոնադրության և հաստիքացուցակի նախագծերը՝ Երևան քաղաքի ավագանու և Երևանի քաղաքապետի քննարկմանն ու հաստատմանը ներկայացնելու համար:
Իսկ որոշման կատարման կազմակերպումն ու պատասխանատվությունը դրվել է Երևանի քաղաքապետարանի աշխատակազմի բնապահպանության վարչության պետի վրա:
Որոշման կատարման հսկողությունը վերապահվել է Երևանի քաղաքապետի առաջին տեղակալ Հրաչյա Սարգսյանին:
Քաղաքապետի որոշումն ուժի մեջ կմտնի այն հաստատելու մասին Երևան քաղաքի ավագանու որոշումն ուժի մեջ մտնելու պահից:
