Մանվել Գրիգորյանի կալանավորումը՝ ԱԱԾ շենքի մոտ

Ազգային ժողովի նախկին պատգամավոր Մանվել Գրիգորյանն արդեն Ազգային անվտանգության ծառայության շենքում է: Նա ներկայացավ «Երևան-Կենտրոն» ՔԿՀ։

Իրավաբան.net-ի լրագրողի փոխանցմամբ նրանք ԱԱԾ են մտել շենքի հետնամասից:

Հիշեցնենք, որ այսօր՝ հունվարի 22-ին, վերաքննիչ քրեական դատարանը հրապարակել է ԱԺ նախկին պատգամավոր Մանվել Գրիգորյանի դեմ խափանման միջոցի վերաբերյալ որոշումը և նա նորից կալանավորվել է:

Մանվել Գրիգորյանը դեկտեմբերի 21-ին 25 միլիոն դրամի գրավի դիմաց ազատ է արձակվել կալանավայրից՝ առաջին ատյանի դատարանի որոշմամբ:

Նշենք, որ ԱԱԾ-ի կողմից իրականացված օպերատիվ-հետախուզական միջոցառումների արդյունքում տվյալներ են ստացվել այն մասին, որ  ՀՀ ԱԺ պատգամավոր, ԵԿՄ նախագահ Մանվել Գրիգորյանը այլ անձանց հետ նախնական համաձայնությամբ ապօրինի կերպով ձեռք է բերել և պահում է զենք և ռազմամթերք:Դեպքի առթիվ ՀՀ ԱԱԾ քննչական վարչությունում հարուցվել է  քրեական գործ ` ՀՀ քրեական օրենսգրքի 235-րդ հոդվածի 2-րդ մասի հատկանիշներով: Գործի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով  պահվող մեծ թվով զենք և ռազմամթերք:

ԱԺ պատգամավոր Մանվել Գրիգորյանը բերման է ենթարկվել և ձերբակալվել`  ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Իրավաբան.net

Հետևեք մեզ Facebook-ում

  Պատուհանը կփակվի 6 վայրկյանից...   Փակել