Իրավական ակտերի նախագծերի հրապարակման միասնական կայքում նոր նախագիծ է հրապաակվել, որով փոփոխութոյւններ կկատարվեն հարկային օրենսգրքում։
Նախագծով՝ միկրոձեռնարկությունները, որոնց շրջանառության տարեկան մեծությունը չի գերազանցում 20 մլն դրամը, ամբողջությամբ ազատված կլինեն հարկերից: Միկրոձեռնարկատիրության սուբյեկտները նաև որպես վարձու աշխատող կարող են ներգրավել ֆիզիկական անձանց առանց սահմանափակումների, որոնց աշխատավարձից եկամտային հարկը հաշվարկվելու է հաստատագրված 5000 դրամի չափով՝ ներկայիս 23 կամ 28 տոկոսների փոխարեն:
Հարկային օրենսգրքով նաև առաջարկվում է էականորեն պարզեցնել փոքր ձեռնարկատիրության հարկման համակարգը: Մասնավորապես, առաջարկվում է ինքնազբաղված անձանց հարկման համակարգի և ընտանեկան ձեռնարկատիրության համակարգի փոխարեն ներդնել մեկ միասնական՝ միկրոձեռնարկատիրության հարկման համակարգ՝ սահմանելով, որ հարկման այս համակարգից կարող են օգտվել իրավաբանական անձինք և անհատ ձեռնարկատերերը, եթե վերջիններիս իրացման շրջանառության տարեկան մեծությունը չի գերազանցում 20 մլն դրամը:
Ներկայումս գործող հարկային օրենսդրությամբ սահմանված են հարկման հետևյալ այլընտրանքային համակարգերը՝ ինքնազբաղված անձանց հարկման համակարգ, որի շրջանակներում մինչև 9 մլն դրամ շրջանառություն ունեցող գործունեության որոշ տեսակներով զբաղվող հարկ վճարողները ամբողջությամբ ազատված են հարկերից: Հարկման այլընտրանքային համակարգերից մյուսը ընտանեկան ձեռնարկատիրության հարկման համակարգն է, որի շրջանակներում մինչև 18 մլն դրամ շրջանառություն ունեցող և ընտանիքի անդամների միջոցով գործունեություն իրականացնող հարկ վճարողները ամբողջությամբ ազատված են հարկերից:
Այժմ այս երկու համակարգերի փոխարեն առաջարկվում է մեկ միասնական՝ միկրոձեռնարկատիրության հարկման համակարգ:
«Խնդիրն այն է, որ հարկման տարբեր համակարգերի կիրառության նախորդ տարիների, ինչպես նաև միջազգային փորձի ուսումնասիրության արդյունքները ցույց են տալիս, որ հարկման համակարգերի բազմազանությունն անխուսափելիորեն հանգեցնում է մի շարք բացասական երևույթների, մասնավորապես՝ հարկային օրենսդրության բարդության, օրենսդրական երկիմաստությունների, անորոշությունների և հարկային վարչարարության հետ կապված դժվարությունների»,- նշված է նախագծում:
Հարկային օրենսգրքի նոր տարբերակում նաև առաջարկվում է շրջանառության հարկի շեմը թողնել անփոփոխ՝ 115 մլն դրամ:
Հիշեցնենք, որ Հարկային օրենսգրքի նախորդ փոփոխություններով 2019 թ.-ի հունվարի 1-ից նախատեսված է շրջանառության հարկի շեմը 115 մլն դրամից դարձնել 58.35 մլն դրամ:
Միկրոձեռնարկություններին վերաբերող հարկային փոփոխությունները նախատեսվում է ուժի մեջ մտցնել 2020 թվականի հունվարի 1-ից:
