Այսօր Երևանի ընդհանուր իրավասության դատարանում Նորք Մարաշի զինված խմբի գործով հերթական դատական նիստն  էր հրավիրված: Գործը քննվում է դատավոր Արման Բեկթաշյանի նախագահությամբ:

Նիստը սկսվեց նախատեսվածից մոտ կես ժամ ուշ: Այդ պահին, սակայն, դեռևս ներկա չէին պաշտպանական կողմի երեք փաստաբանները՝ Էդուարդ Աղաջանյանը, Զարուհի Հայրապետյանը և  Ինեսսա Պետրոսյանը:

Չնայած պաշտպանական կողմի մյուս ներկայացուցիչները փորձեցին միջնորդություն ներկայացնել դատական նիստը շարունակելու վերաբերյալ, բայց դատարանը որոշեց հետաձգել այն՝ միանգամից նշանակելով հաջորդ երկու  դատական նիստերի օրերը:

Դրանք  տեղի կունենան մարտի 16-ին և  17-ին:

Հիշեցնենք, որ գործով անցնող 20 ամբաստանյալներին մեղադրանք է առաջադրվել ապօրինի կերպով մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր  ձեռք  բերելու, պահելու, փոխադրելու  և կրելու համար: Ըստ մեղադրական եզրակացության, զինված խմբի անդամները նպատակ են ունեցել Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրանց կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Սոնա Վարդանյան
Իրավաբան.net