Այսօր տեղի ունեցավ Նորք Մարաշի զինված խմբի գործով հերթական դատական նիստը Երևանի ընդհանուր իրավասության դատարանում: Գործը քննվում է դատավոր Արմեն Բեկթաշյանի նախագահությամբ։
Հիշեցնենք, որ, ըստ մեղադրական եզրակացության, գործով անցնող 20 ամբաստանյալները նպատակ են ունեցել Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրանց կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են ՀՀ ազգային անվտանգության ծառայության աշխատակիցների կողմից:
Այնուհետև մեղադրող կողմը ներկայացրեց ամբաստանյալների մոտ հայտնաբերված նոթատետրերի մեջ եղած առանձնակի կարևորություն ունեցող տվյալները: Մասնավորապես նշվեց, որ նոթատետրերում տվյալներ են եղել ռազմամթերքի քանակի վերաբերյալ, ինչպես նաև նշված են եղել խմբի անդամների ծածկանունները: Մեկ այլ նոթատետրում ծածկանուններով նշված են եղել այն տեղերը, որոնք հետաքրքրություն են ներկայացրել զինված խմբի համար: Դրանց թվում են եղել տարբեր պետական մարմինների, ինչպես օրինակ ԱԺ, Սահմանադրական դատարանն, և այլ գերատեսչությունների անվանումներ: Մեղադրող կողմը նշեց նաև հայտնաբերված տեսաձայնագրության մասին, որտեղ Արթուր Վարդանյանի ուղերձն էր․ այն պետք է եթեր հեռարձակվեր զինված խմբի կողմից իշխանությունը բռնությամբ զավթելուց հետո:
Մեղադրող կողմի ելույթից հետո հայտարարություն արեց ամբաստանյալ, ըստ մեղադրանքի, զինված խմբի պարագլուխ Արթուր Վարդանյանը: Իր խոսքում նա նշեց, որ ամբաստանյալներին ներկայացնում են որպես հանցագործներ, բայց այսօր համար մեկ հանցագործը հենց մեղադրող կողմն է: Արթուր Վարդանյանը նաև ասաց, որ չնշվեցին ապրիլյան պատերազմի մասին եղած տեղեկությունները, որ կային նոթատետրի մեջ, բացի սրանից նաև Հայոց ցեղասպանությանը վերաբերող որոշ տվյալներ, որոնք նույնպես կային մեղադրող կողմի ներկայացրած նոթատետրերում:
«Ձեզ հետաքրքրում է միայն այն, որ գտել եք 3 ձեռնոց, 4 հատ «մասկա» ,- նշեց Արթուր Վարդանյանը:
Դատական նիստի հետագա ընթացքում դատարանը նկատողություն արեց ամբաստանյալ Վաղինակ Ստեփանյանին, քանի որ վերջինս խախտել էր դատական կարգը: Ստեփանյանը փորձել էր խոսել Արթուր Վարդանյանի հետ՝ ձայն տալով իրենից քիչ ավելի հեռու նստած Արթուր Վարդանյանին։ Թեև Վարդանյանը պնդեց, որ այդ ինքն էր կանչել Ստեփանյանի անունը, որպեսզի նրան ինչ-որ բան ասեր:
Այնուհետև մեղադրող կողմը ներկայացրեց ամբաստանյալների հեռախոսահամարները, որոնցով նրանք, ըստ մեղադրող կողմի, գաղտնի խոսակցություններ են վարել: Այս տվյալների ներկայացումից հետո ելույթ ունեցավ Արթուր Վարդանյանը և ասաց, թե չի հասկանում ինչպես են որոշել՝ որ հեռախոսահամարից է գաղտնի զրույց եղել, իսկ որից՝ ոչ։
Պաշտպանական կողմը միջնորդություն ներկայցրեց դատական նիստը հետաձգելու վերաբերյալ, քանի որ մեկ այլ գործով նիստի պետք է մասնակցի։ Դատարանը բավարարեց միջնորդւոյթւոնն ու հաջորդ դատական նիստը նշանակեց մյուս ուրբաթ օրը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Սոնա Վարդանյան
