Սկանդալային օֆշորի գործով այսօր շարունակվեց վկաների հարցաքննության փուլը: Դատարան էր ներկայացել վկա Նելլի Հարութունյանը, ով 2007 թվականից «Ջի սի Էյ» ոսկերչական ընկերության տնօրենն է:
Հարցաքննության ընթացքում հայտնեց, որ ինքը Աշոտ Սուքիասյանին տեսել է ընդամենը մեկ անգամ՝ Էկոնոմիկայի նախարարության կողմից կազմակերպած հանդիպան ժամանակ. «Էկոնոմիկայի նախարարությունը իմ էլեկտրոնային հասցեին մասնակցության հրավեր էր ուղարկել` ադամանդի հումքի մշակման տարբեր խնդիրներ քննարկելու վերաբերյալ: Եթե չեմ սխալվում, դա եղել է 2006 թվականին: Այդ հանդիպան ժամանակ եմ տեսել Աշոտ Սուքիասյանին, մինչ այդ նրան չեմ ճանաչել, միայն լսել եմ, որ բիզնեսմեն է, բարեկամական կամ թշնամական հարաբերություններ չեմ ունեցել»:
Վկայի խոսքով, այդ հանդիպման ժամանակ մասնակցել են մոտ 10-15 ոսկերչական կազմակերպությունների ներկայացուցիչներ: Հանդիպումը բացել է Էկոնոմիկայի նախկին նախարար Ներսես Երիցյանը, որը խոսքը փոխանցել է Աշոտ Սուքիասյանին և նա էլ ներկաներին ադամանդի հումք է առաջարկել` 50 տոկոս էժան շուկայական գնից. «Նա ասաց, որ Աֆրիկայից ադամանդի հումք կարող է բերել՝ մատչելի գներով: Նրա խոսքից ենթադրվում էր, որ հանքը իրեն է պատկանում: Ներդրումների մասին խոսք չի գնացել, իսկ մեր եզրահանգումը եղավ այն, որ մինչև հումքը չտեսնենք մեր աչքով, չենք գնի»:
Նիստը նախագահող դատավոր Վլադիմիր Գրիգորյանի այն հարցին, թե նախկին վարչապետ Տիգրան Սարգսյանը հանդպանը ներկա գտնվե՞լ է, վկան պատասխանեց՝ ոչ: Նա նաև հավելեց, որ այդ հանդիպման ընթացքում չի տեսել Փայլակ Հայրապետյանին. «Եթե Փայլակ Հայրապետյանը ներկա եղած լիներ հանդիպանը, գոնե կմտաբերեի»:
Ըստ վկա Նելլի Հարութունյանի ցուցմունքի՝ ինքը այլևս չի հետաքրրքվել` արդյո՞ք հումքից նմուշ բերվել է Հայաստան, թե՝ ոչ, քանի որ այլևս նրան հանդիպան առաջարկներ չեն արվել:
Դատարանը վկա Նելլի Հարութունյանի ցուցմունքում որոշակի հակասություններ տեսնելով` հրապարակեց նախաքննության ընթացքում տրված ցուցմունքը: Նախաքննության ժամանակ նա ասել էր, որ Էկոնոմիկայի նախարարությունը հանդիպումը կազմակերպվել է 2009 թվականին, նշել էր նաև հանդիպանը ներկա ներկայացուցիչների անուները, որոնք դատարանում չներկայացրեց: Այս հակասությունը նա բացատրեց հիշողության հետ, քանի որ երկար ժամանակ է անցել:
Վկա 70-ամյա ԱՄՆ քաղաքացի Արփիկ Բալյանի մասով դատարանը որոշեց ծանուցում ուղարկել նրա աշխատանքի վայր` Ամերիկյան համալսարանի ղեկավարությանը, որպեսզի նրան իրազեկեն, իսկ հաջորդ նիստին ևս չներկայանալու դեպքում` բերման ենթարկելու որոշում կայացնել: Կողմերը համաձայնեցին դատարանի որոշման հետ:
Տուժողի ներկայացուցիչ Ինգա Ավագյանը միջնորդություն ներկայացրեց դատարանին, որպեսզի քրեական գործի շրջանակներում Աշոտ Սուքիասյանի նկատմամբ հարուցվի նաև քաղաքացիական հայց` մասնավորապես նրա գույքի, հարազատների` կնոջ և երեխաների ունեցվածքի վրա կալանք դրվի և հօգուտ Փայլակ Հայրապետյանի բռնագանձվի 8 միլիարդ 560 միլիոն դրամ գումար:
Նմանատիպ հայցեր ներկայացրեցին նաև գործով տուժող այլ ներկայացուցիչներ: Դատարանը պաշտպանական կողմին ժամանակ տրամադրեց, որպեսզի ծանոթանա հայցերին և հանդես գա պատասխանով:
Լ. Մամյան
