Կոռուպցիոն ռիսկերը ներհիվանդանոցային դեղաշրջանառության տարբեր օղակներում ծրագիրն իրականացվում է Գեղարքունիքի մի շարք քաղաքների ստացիոնար բուժհաստատություններում, որպեսզի հայտնաբերվի ոլորտում առկա խնդիրները` կոռուպցիոն ռիսկերը նվազեցնելու նպատակով:
Ծրագրի ղեկավար Սաթիկ Բադեյանը Իրավաբան.net-ի հետ զրույցում նախ ներկայացրեց ծրագրի բուն էությունը՝ նշելով, որ ծրագիրը պետք է տևեր 4 ամիս, սակայն պայմանագրով նրանք մեկ ամիս երկարացրել են այն, քանի որ մարզպետարանում կադրային փոփոխություններ էին տեղի ունեցել, որոնք ազդել էի առողջապահության ոլորտի վրա:
«Մենք մի փոքր խնդիր ունեինք բուժհաստատություններ մտնելու հետ կապված, ուստի բանակցությունները երկարեցին մինչև մարզպետարանը թույլ տվեց, որ մենք մտնենք բուժհաստատություններ»,- իր խոսքում նշեց Սաթիկ Բադեյանը:
Ծրագիրը գտնվում է 5-րդ` վերջին ամսում, այսինքն մի քանի օրից զեկույցը կհրապարակվի և մոնիտորինգի արդյունքները կուղարկվեն Առողջապահության նախարարություն:
«Մենք այսօր գրություն ենք ուղարկել Առողջապահության նախարարություն, որ հնարավորություն տան մեզ իրենց մոտ ներկայացնելու ծրագրի արդյունքները»,- հավելեց տիկին Բադեյանը:
Այն հարցին, թե արդյո՞ք մոնիթորինգը դրական փոփոխություններ է արձանագրել, նա նշեց, որ այս կարգի կարճաժամկետ մոնիթորինգները միայն բացահայտում են և հնարավորություն են տալիս համակարգում առկա խնդիրները վերացնելով` նպաստել կոռուպցիոն դրսևորումների նվազմանը:
«Մենք վեր ենք հանել այնպիսի խնդիրներ որոնք Հանրապետության առողջապահական ոլորտում առկա են, այսինքն մեր նպատակն էր մարզային խնդիրները վեր հանելով, նպաստել ոլորտում առկա կոռուպցիոն ռիսկերի նվազմանը»,- իր խոսքը եզրափակեց Սաթիկ Բադեյանը:
«Կոռուպցիայի դեմ պայքարի բազմակողմանի խթանում» ծրագիրն իրականացվում է Հայաստանի երիտասարդ իրավաբանների ասոցիացիայի կողմից՝ գործընկեր՝ Ինֆորմացիայի ազատության կենտրոնի հետ համատեղ՝ Եվրոպական Միության և ԵԱՀԿ ֆինանսական օժանդակությամբ:
Ա. Սիրադեղյան
