«Դա զավեշտ է, այն էլ այդ անդամներով համալրված նման կառույց չի կարող որևէ դրական ցուցանիշ ցույց տալ կոռուպցիայի պայքարի բնագավառում»,-Իրավաբան.net-ի հետ զրույցում ասաց իրավապաշտպան, «Իրավունքի և ազատության կենտրոն» ՀԿ նախագահ Վարդան Հարությունյանը՝ անդրադառնալով հակակոռուպցիոն խորհրդի երեկ տեղի ունեցած առաջին նիստին:
Նրա խոսքով, միայն այն, որ հասարակական կազմակերպություններն ու ԱԺ ընդդիմադիր խմբակցությունները հրաժարվել են անդամակցել այդ խորհրդին, վկայում է այն մասին, որ չեն հավատում կառավարության կողմից ստեղծված այս խորհրդի գործունեության արդյունավետությանը:
Իրավապաշտպանի կարծիքով, եթե կոռուպցիայի դեմ պայքարելու կամք լինի, ապա այդ խորհրդում կառավարությունից հնարավորինս քիչ ներկայացուցիչ պետք է լիներ, և անդամների մեծամասնությունը պետք է լինեն քաղաքացիական հասարակության ներկայացուցիչներ, ովքեր մասնագիտացած են ոլորտում և կարող են պրոֆեսիոնալ աշխատել:
Լուսանկարը՝ «Ֆոտոլուր»-ի
