Այս տարի ՀՀ 2-րդ նախագահ Ռոբերտ Քոչարյանը դատական 3 հայց է ներկայացել դատարան՝ ընդդեմ «Սկիզբ Մեդիա Կենտրոն» ՍՊ ընկերության, Առաջին լրատվական տեղեկատվական վերլուծական կենտրոնի (1in.am) և «Ժամանակ» օրաթերթի։
Այս մասին տեղեկանում ենք դատական տեղեկատվական համակարգից։
Առաջին հայցադիմումը Երևանի ընդհանուր իրավասության դատարան ներկայացվել է հունիսի 19-ին։ Գործը մակագրվել է դատավոր Հայարփի Զարգարյանին։ Հավելենք, որ այս դատավորին է այժմ մակագրված Ռոբերտ Քոչարյանի հայցադիմումն ընդդեմ վարչապետ Նիկոլ Փաշինյանի։ Այս հայցադիմումն ընդդեմ «Սկիզբ Մեդիա Կենտրոն» ՍՊ ընկերության, «Առաջին լրատվական» տեղեկատվական վերլուծական կենտրոնի և «Ժամանակ» օրաթերթի է եղել։ Ռոբերտ Քոչարյանը պահանջ է ներկայացրել հերքել զրպարտություն համարվող փաստացի տվյալները և զրպարտության դիմաց 2 միլիոն դրամի հատուցում:
Քանի որ Ռոբերտ Քոչարյանի ներկայացուցիչ Աննա Սարդարյանի հայցադիմումը մի շարք խախտումներով է եղել, դատարանը որոշում է վերադարձնել այն։ Մասնավորպես, առկա չեն եղել որոշ փաստաթղթերի բնօրինակներ, ինչպեսև պարզ չի եղել, թե կոնկրետ ո՞վ է պատասխանող կողմը և արդյո՞ք նրանց ներկայացված նյութաիրավական պահանջը կամ պահանջները տարբեր են։
Երկրորդ հայցադիմումը ներկայացվել է հուլիսի 12-ին։ Այն ընդդեմ «Սկիզբ Մեդիա Կենտրոն» ՍՊ ընկերության է եղել։ Գործը մակագրվել է դատավոր Նաիրա Ավետիսյանին։ Քոչարյանը պահանջ է ներկայացրել զրպարտության դիմաց փոխհատուցում ստանալու և հրապարակայնորեն հերքելու մասին։
Այս հայցադիմումը նույնպես հետ է վերադարձվել, քանի որ այն չի համապատասխանել Քաղաքացիական դատավարության օրենսգրքով ամրագրված հայցադիմումի ձևին, բովանդակությանը և կից փաստաթղթերին ներկայացվող պահանջներին։ Հայցադիմումում հայցվորի ներկայացուցչի կողմից չեն նշվել անձնագրային տվյալները:
Երրորդ հայցադիմումը ներկայացվել էհուլիսի 27-ին և օգոստոսի 8-ին վարույթ է ընդունվել։ Գործը մակագրվել է դատավոր Սարգիս Երիցյանին։
ՀՀ 2-րդ նախագահի հայցադիմումն ընդդեմ «Սկիզբ Մեդիա Կենտրոն» ՍՊ ընկերության է եղել, և նա պահանջ է ներկայացրել զրպարտություն համարվող փաստացի տվյալները հրապարակայնորեն հերքելու և զրպարտության դիմաց փոխհատուցում ստանալու մասին։
Հայցադիմումը վարույթ ընդունելու մասին որոշումից պարզ է դառնում, որ այս ընկերությանն են պատկանում www.1in.am ինտերնետային կայքը և «Ժամանակ» օրաթերթը։
Լրատվամիջոցներում հունիսի 7-ին հրապարակվել են հոդվածներ` «Գրիգոր Գրիգորյանը ցուցմունք է տվել Քոչարյանի դեմ, վերջինս կարող է կալանավորվել» վերնագրով, որում տեղ են գտել Ռոբերտ Քոչարյանի պատիվը և արժանապատվությունը արատավորող տեղեկություններ, քանի որ հրապարակայնորեն ներկայացված փաստերը ամբողջությամբ չեն համապատասխանում իրականությանը:
2018 թվականի հունիսի 23-ին, 24-ին և 28-ին www.1in.am տեղեկատվական-վերլուծական ինտերնետային կայքում հրապարակվել են երկու վերլուծական հոդվածներ, որոնց հեղինակը Սարգիս Արծրունին է․
- «Ռոբերտ Քոչարյանի խուճապը. երկրորդ նախագահը` բանտի ճանապարհին»,
- «Հակահեղափոխության արյունոտ սիմվոլը` Ռոբերտ Քոչարյան»,
- «Քոչարյան-Սարգսյան. Արյունոտ քսանամյակի շահառուները»։
Հայցադիմումի համաձայն, նշված հոդվածներում ևս տեղ են գտել Ռոբերտ Քոչարյանի պատիվը և արժանապատվությունը արատավորող տեղեկություններ, քանի որ հրապարակայնորեն ներկայացված փաստերը չեն համապատասխանում իրականությանը:
Այս հայցադիմումով պահանջ է ներկայացվել պարտավորեցնել «Սկիզբ Մեդիա Կենտրոն» ՍՊ ընկերությանը զրպարտության դիմաց Ռոբերտ Քոչարյանին վճարել փոխհատուցում 2.000.000 դրամի չափով:
Ալիսա Չիլինգարյան
