Դատավոր Լիլի Դրմեյան – Հաշվի առնելով այս գործի բարդությունը, ծավալը և այն, որ բացի սույն վարույթից ձեզ նաև մակագրվել են այլ նոր վարույթներ, ողջամիտ գտնում եմ երկամսյա ժամկետի տրամադրումը։ Ե՞րբ է ձեզ մակագրվել այս գործը։

ՀՀ գլխավոր դատախազության ներկայացուցիչ Տիգրան Ենոքյան – Կարծեմ սեպտեմբերի 20-ին։

Դատավոր Լիլի Դրմեյան. – Նախորդ ներկայացուցիչը պաշտոնից ազատվել էր սեպտեմբերի սկզբներին, այնպես որ սեպտեմբերի 20-ից մինչ այժմ մեկ ամսից մի փոքր պակաս ժամանակ ունեցել եք ծանոթանալու համար, բայց փաստորեն բավարար չի եղել։ Լավ, ընդունում եմ ձեր միջնորդությունը երկու ամիս ժամկետի վերաբերյալ։ Առարկություններ կան միջնորդության վերաբերյալ։

Պատասխանող կողմ – Հարգելի նախագահող, չունեմ առարկություն։ Հաշվի առնելով պարոն Ենոքյանի ծանրաբեռնվածությունը և այս գործի ծավալը, բնականաբար ողջամիտ է երկամսյա ժամկետը։ Իմ կարծիքով՝ այս ամբողջ գործը հասկանալու, ընկալելու և դատարանում ներկայացուցչություն իրականացնելու համար երկամսյա ժամկետը նույնիսկ քիչ է։ Չեմ առարկում ժամկետի երկարաձգմանը։

Դատավոր Լիլի Դրմեյան – Իսկ մյուս ներկայացուցիչները առարկություն ունե՞ն։

Պատասխանող Գագիկ Ծառուկյանի ներկայացուցիչ Հարություն Հարությունյան – Հարգելի դատարան, ես էլ առարկություն չունեմ, բայց մինչև հետաձգման հարցին անդրադառնալը մի հրատապ քննության ենթակա միջնորդություն ունեմ։

Դատավոր Լիլի Դրմեյան -Ի՞նչ միջնորդություն։

Հարություն Հարությունյան  – Հայցի ապահովման միջոցը վերացնելու կամ ձևափոխելու վերաբերյալ։

Դատավոր Լիլի Դրմեյան – Միջնորդությունը ներկայացրե՞լ եք կողմերին։ Պարոն Ենոքյան, ձեզ տրամադրվե՞լ է։

Տիգրան Ենոքյան – Այո, հենց նոր է փոխանցվել։

Դատավոր Լիլի Դրմեյան – Պարոն Հարությունյան, առաջարկում եմ ներկայացնել Ձեր միջնորդությունը։ Սա լիազորագիր է։

Հարություն Հարությունյան – Այո, «Մուլտի Գրուպ» կոնցեռնի անունից է։

Դատավոր Լիլի Դրմեյան – Այսինքն՝ միջնորդություն ներկայացվում է «Մուլտի Գրուպ» կոնցեռնի անունից։ Դատարանին ներկայացվեց լիազորագիր՝ 2025 թվականի հոկտեմբերի 1-ով թվագրված, որով «Մուլտի Գրուպ» կոնցեռն ՍՊԸ-ն, ի թիվս այլ փաստաբանների, նաև Հարություն Հարությունյանին լիազորել է դատական ներկայացուցչություն իրականացնել։ Հատուկ լիազորություններ նշված են, տրված է երեք տարի ժամկետով։ Լիազորագիրը պատշաճ է և կկցվի գործի նյութերին։ Առաջարկում եմ հրապարակել միջնորդությունը։

Հարություն Հարությունյան – Հարգելի դատարան, շատ կարճ։ Այս ընկերությունը խոշոր կառուցապատող ընկերություն է, որն Աբովյան քաղաքում կառուցել է 13 շենք։ Դրանցից չորսը իրենց համար հիմնական միջոց են, այսինքն՝ ոչ թե գնման իրավունքներն են օտարվում, այլ շարունակելու են մնալ ընկերության անունով։ Շինարարությունն արդեն ավարտվել է, և որպեսզի իրավունքը ստանա պետական գրանցում, անհրաժեշտ է դատարանի կողմից հայցի ապահովման միջոցը ձևափոխել այնպես, որ հնարավորություն տա գրանցել սեփականության իրավունքը՝ պահպանելով օտարման արգելքը։

Մնացած ինը շենքի մասով, որոնք իրենց համար եղել են շրջանառու միջոց, արդեն ներկայացվել է փորձաքննության եզրակացություն և կազմակերպվել է գնման իրավունքների օտարումը։ Իսկ այս չորս շենքի դեպքում ոչ թե օտարման խնդիր կա, այլ պահպանման։ Բնական է, որ գույքի նկատմամբ իրավունքի պետական գրանցումից հետո այդ գույքի արժեքը մի բան էլ ավելանում է։ Օտարելու մտադրություն չունենք, դրա համար էլ խնդրում ենք օտարման արգելքը պահպանել։

Դատավոր Լիլի Դրմեյան – Այս գույքերի վրա կիրառված էր հայցի ապահովման միջոց՝ տնօրինման արգելք, այսինքն՝ ուղղակիորեն այս գույքերի վրա կիրառվա՞ծ է։

Հարություն Հարությունյան – Այո։ Սրանք Աբովյան քաղաքի Զորավար Անդրանիկի փողոցում գտնվող բազմաբնակարան շենքեր են, որոնցից կոնկրետ այս չորսը, որ նշել ենք, հիմնական միջոց են՝ ի տարբերություն մնացածների։ Շինարարությունն արդեն ավարտվել է, ուղղակի անհրաժեշտ է գրանցել իրավունքը։

Դատավոր Լիլի Դրմեյան – Պարոն Ենոքյան, դուք կարո՞ղ եք դիրքորոշում հայտնել։

Դատախազ Տիգրան Ենոքյան – Հարգելի դատարան, սկզբունքորեն չեմ առարկում, որ ապահովման միջոցի այդ մասը ձևափոխվի, բայց կողմը նաև նշեց, որ այդ շենքերը ցանկանում է տրամադրել վարձակալության։ Ուզում եմ, որպեսզի ձևափոխումն այնպես կատարվի, որ օգտագործումը նույնպես արգելվի, և կողմն իր հայեցողությամբ չկարողանա դրանք վարձակալության տալ։ Մտահոգություն ունեմ, որ հնարավոր է՝ հետագա դատական ակտի կատարումից խուսափելու համար ընկերությունը փոխի իր իրավունքները։

Հարություն Հարությունյան – Հարգելի դատարան, մենք այս պահին ընդամենը իրավունքի գրանցում ենք խնդրում։ Երբ որ հարցը հասունանա, առանձին միջնորդությամբ կներկայացնենք, թե ում ենք տալիս վարձակալության և ինչ պայմաններով։

Դատավոր Լիլի Դրմեյան – Այսինքն՝ դուք բովանդակության մեջ նշել եք, որ իրավունքը գրանցելուց հետո նախատեսում եք դրանք հանձնել վարձակալության։

Հարություն Հարությունյան – Այո։

Դատավոր Լիլի Դրմեյան – Իսկ խնդրամասում խնդրել եք վերացնել ապահովման միջոցը կամ ձևափոխել՝ թույլ տալով կատարել իրավունքի պետական գրանցում, պահպանելով միայն օտարման արգելքը։ Ինչպես ենք մեկնաբանում «միայն օտարման արգելքը»։

Հարություն Հարությունյան – Հարգելի դատարան, մեր խնդիրն իրավունքի պետական գրանցումն է։

Դատավոր Լիլի Դրմեյան  – Դուք ասում եք «պահպանելով միայն օտարման արգելքը», այսինքն՝ վարձակալության հանձնելու արգելքը դուրս է գալիս։

Հարություն Հարությունյան – Էդ էլ պահպանենք, Հարգելի դատարան։

Դատավոր Լիլի Դրմեյան – Այսինքն՝ միջնորդությունը լրացնո՞ւմ եք։

Հարություն Հարությունյան – Չէ, ճշգրտում եմ, հստակեցնում եմ։

Դատավոր Լիլի Դրմեյան – Այսինքն՝ Ձեր համար հայցվորի դիրքորոշումն ընդունելի է, որ այդ ձևաչափով հայցի ապահովման միջոցը չի փոփոխվի։

Հարություն Հարությունյան – Հարգելի դատարան, ինձ համար հայցվորի դիրքորոշումն ընդունելի չի կարող համարվել, քանի դեռ մանրամասն չենք քննարկել։ Այս պահին մեր խնդիրը միայն ու միայն սեփականության իրավունքի գրանցումն է։ Մնացածը համապատասխան փուլում կքննարկենք։

Դատավոր Լիլի Դրմեյան – Հասկանալի է։ Լավ, միջնորդությունը քննարկվեց։ Միջնորդության քննարկման արդյունքում դատարանը կկայացնի առանձին դատական ակտ՝ որոշման ձևով, և կուղարկի շահագրգիռ կողմերին։