«Վարչապետը ստանձնել է առաջնորդություն՝ գնացել և պարզ, ուղիղ տեքստով խոսել է այն ամենի մասին, որը Տավուշի հայրենակիցները շատ վաղուց էլ գիտեին, ուղղակի հիմա գնում են արձանագրումների, լուծումներ փնտրելու ճանապարհով»,-այս մասին ԱԺ ճեպազրույցների ժամին հայտարարել է ՔՊ խմբակցության քարտուղար Արթուր Հովհաննիսյանը։
Պատգամավորի խոսքով՝ քննարկումներն, ըստ զարգացումների, բնականաբար, շարունակվելու են։ Նա տեղին չհամարեց դիտարկումը, որ Նիկոլ Փաշինյանը տավուշցիների հետ հանդիպմանը խոստացել էր 10 օր հետո վերադառնալ, բայց չի գնացել։
«Ցանկացած զարգացում կոմունիկացվում է ժողովրդի հետ, չի կարող լինել մի իրավիճակ, որ առանց խոսակցությունների առաջ շարժվենք… Ոչ թե խաբեց, չեկավ․․․, այդ ընկալումները դուրս հանենք մեր մեջից, այդ գործընթացի միջով բոլորս ենք անցնելու»,-ասել է նա։
Անդրադառնալով Տավուշի թեմի առաջնորդ Բագրատ Սրբազանի ակտիվ գործունեությանը՝ Հովհաննիսյանը նշեց, որ նա սխալ մեկնաբանություններ է տալիս։ «Չգիտեմ՝ որտեղից է նրա և հոգևոր դասի մոտ այդ տեղեկությունը։ Կհորդորեմ իրականությանը չհամապատասխանող տեղեկություններ չտարածվեն, որովհետև, ես չէ, որ պետք է ասեմ՝ դա մեղք է»,-ասել է նա։
