Համաժողովրդական շարժմանն են միացել Վանաձորի, Գյումրի բնակիչները։ Նրանք դուրս են եկել փողոց՝ Նիկոլ Փաշինյանի հրաժարականի պահանջով։ Այս մասին հայտարարեցին Հանրապետության հրապարակում ընթացող հանրահավաքում։
«Իշխող համակարգը ճաք է տալիս։ Մենք ստացել ենք ինֆորմացիա, որ Վարդենիսի քաղաքապետն ու ՔՊ-ական ֆրակցիան դուրս են եկել իշխող կուսակցությունից»,-հայտարարեց հանարահավաքը վարողը։
Դրանից հետո հայտարարություն է տարածել Վարդենիս համայնքի ղեկավարը, որում նշվում է․
«Հարգելի հայրենակիցներ, հարգելի վարդենիսցիներ, այսօր մամուլում կեղծ լուրեր են տարածվել թե իբր ես՝ Ահարոն Խաչատրյանս, և մեր խմբակցությունը՝ «Ահարոն Խաչատրյան» խմբակցությունը միացել են ընդդիմության կողմից հայտարարված գործադուլների և դասադուլների կոչին։
Նախ պետք է հայտնեմ, որ այդ տեղեկությունը ամբողջականությամբ կեղծ է։ Ոչ ես, ոչ էլ մեր խմբակցությունը չենք միացել այդ կոչերին։
Սիրելի վարդենիսցիներ, ձեզ ու ողջ հայությանը կոչ եմ անում արտաքին վտանգի ժամանակ համախմբվել պետության և պետականության շուրջ, տուրք չտալ անհայտ կենտրոններից ղեկավարվող անհայտ խմբերի սադրիչ գործողություններին։
Մենք հիմա պիտի մտածենք մեր արցախցի քույրերին ու եղբայրներին հնարավորության չափով օգնելու և մեր պետականությունը ամուր պահելու մասին։
Վարդենիսն ու վարդենիսցին ամուր կանգնած են մեր պետականության, անկախության և ինքնիշխանության համար»,-նշվում է հայտարարության մեջ։
Այնուհետև Հրապարակում հայտարարեցին, որ նախորդ հայտարարության մեջ շտկում են ուզում անել․ «Վարդենիսի «Միասնական Վարդենիս» ավագանու խմբակցություն է մեզ միացել»։
