ՀՀ 2-րդ նախագահ, կաշառք ստանալու համար մեղադրվող Ռոբերտ Քոչարյանի և նույն գործով ամբաստանյալ, Ազգային ժողովի «Հայաստան» խմբակցության պատգամավոր Արմեն Գևորգյանի գործով դատական նիստը չի կայանա։ Փաստաբանական խմբից հայտնում են, որ Երևան քաղաքի ընդհանուր իրավասության դատարանը՝ Աննա Դանիբեկյանի նախագահությամբ, այսօր հետաձգել է դատական նիստը։

Առողջական խնդիրներով պայմանավորված՝ Ռոբերտ Քոչարյանը չի ներկայացել դատարան։ Հաջորդ դատական նիստը տեղի կունենա ապրիլի 18-ին, ժամը 13։00-ին։

Նշենք, որ ըստ մեղադրանքի՝ Ռոբերտ Քոչարյանը Սիլվա Համբաձումյանի ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։

Արմեն Գևորգյանը վերոնշյալ գործարքի շրջանակներում Սամվել Մայրապետյանի օժանդակությամբ Սիլվա Համբարձումյանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք և օրինականացրել է ստացված եկամուտները:

Հիշեցնենք, որ փետրվարի 14–ին ևս դատական նիստը հետաձգվել էր նույն հիմքով՝ Քոչարյանը նիստին չէր ներկայացել առողջական խնդիրերով պայմանավորված։ Նույն հիմքով դատական նիստը հետաձգվել էր նաև դեկտեմբերի 20–ից մինչև հունվարի 31–ը։