Վերջերս Նյու Դելի կատարած այցի ժամանակ Սպիտակ տան Ազգային տնտեսական խորհրդի փոխտնօրեն Դյուլիպ Սինգհը պատմել է Հնդկաստանի իշխանություններին հակառուսական պատժամիջոցների պահպանման կարևորության մասին և առաջարկել օգնություն Ռուսաստանի Դաշնությունից նավթի մատակարարումներից կախվածությունը նվազեցնելու համար:

Այս մասին այսօր՝ ապրիլի 8-ին, հերթական ճեպազրույցում հայտարարել է Սպիտակ տան մամուլի քարտուղար Ջեն Փսակին, փոխանցում է «ՏԱՍՍ» լրատվական գործակալությունը:

Փսակին նշել է, որ յուրաքանչյուր երկիր, ներառյալ Հնդկաստանը, ինքնուրույն է որոշում՝ ներկրել ռուսական նավթը թե՞ ոչ:

Նշենք, որ այս շաբաթվա սկզբին Փսակին հայտնել էր, որ ԱՄՆ-ն փորձում է համոզել Հնդկաստանին հրաժարվել Ռուսաստանից էներգակիրների ներմուծումն ընդլայնելու մտադրությունից։

Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:

ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։

Գերագույն Ռադան Ուկրաինայում ռազմական դրություն է մտցրել։