Օկուպանտները Բելառուսի տարածքից «Իսկանդեր» հրթիռներով հարվածել են Ուկրաինային, փոխանցում է Украина сегодня-ն։
Այս մասին Telegram-ի իր ալիքում հայտնել է Ուկրաինայի ներքին գործերի նախարարի խորհրդական Անտոն Գերաշչենկոն։
«Դա տեղի է ունեցել 17։00-ին մոտ (Երևանի ժամանակով 19։00-ին)։
Տեսանկարահանումը կատարվել է Ռովենսկայա շրջանից։ Սա՞ է ձեր զինադադարը»,-նշել է նա իր գրառման մեջ ու կից տեսանյութ հրապարակել։
Ավելի ուշ Գերաշչենկոն հայտնել է, որ «Իսկանդերով» հարված է հասցվել Ժիտոմիրի օդանավակայանին։
«Գիտե՞ք դա ինչ է նշանակում։ Լուցկի, Ռիվնեի և Ժիտոմիրի շրջանները պետք է պատրաստվեն, առաջիկա օրերին «տապակել» ոչ միայն ռուս, այլև բելառուս զավթիչներին»,-գրել է նա։
Украина сегодня-ն հայտնում է, որ ավելի վաղ Բելառուսից գնդակոծվել էր Վոլինի շրջանի Վլադիմիր քաղաքի մոտ գտնվող զորամասը։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։
«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։
Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։
