Ռուսաստանի պաշտպանության նախարարությունը հայտարարել է, որ ուկրաինացի զինվորականները զանգվածաբար հրաժարվում են կռվելուց։

«Հատուկ ռազմական գործողության ընթացքում ուկրաինացի զինվորականների կողմից ռազմական գործողությունները շարունակելու զանգվածային մերժման գործընթացը շարունակվում է», – ասել է ՌԴ ՊՆ խոսնակ Իգոր Կոնաշենկովը, փոխանցում է Комсомольская правда-ն:

Ավելի վաղ նա հայտնել էր, որ ռուս զինվորականները արգելափակել են Խերսոն և Բերդյանսկ քաղաքները, ինչպես նաև վերահսկողության տակ են վերցրել Գենիչևսկը և Խերսոնի մոտ գտնվող Չեռնոբաևկա օդանավակայանը։

__________

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։

«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:

Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։

Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։