ԱՄՆ-ի և Ուկրաինայի նախագահները քննարկել են Ռուսաստանի Դաշնության դեմ պատժամիջոցների և Կիևին պաշտպանական լրացուցիչ օգնության մատակարարումների մասին հարցեր: Այս մասին լրագրողների հետ զրույցում հայտնել է ԱՄՆ-ում Ուկրաինայի դեսպան Օքսանա Մակարովան, փոխանցում է «ՌԻԱ Նովոստին»։
«Այսօրվա զրույցի ժամանակ ԱՄՆ նախագահ Ջո Բայդենը և Ուկրաինայի նախագահ Վլադիմիր Զելենսկին խոսել են պատժամիջոցների և Ուկրաինային լրացուցիչ պաշտպանական մատակարարումների մասին», – ասել է ԱՄՆ-ում Ուկրաինայի դեսպանը։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։
«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 05:00-ից (Երևանի ժամանակով 07:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։
Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։
