Թբիլիսիում մեկնարկել է Հայոց Ցեղասպանության 106-րդ տարելիցին նվիրված բողոքի ցույցը:
Այս մասին հայտնում է «Ալիք Մեդիան»։
Այս տարի ցուցարարները հավաքվել են Թբիլիսիի Ֆիլհարմոնիայի շենքի մոտ, որտեղից երթով շարժվում են դեպի Վրաստանում Թուրքիայի դեսպանատան շենք: Ցույցը նախաձեռնել է «Վրաստանի հայ համայնք» կազմակերպությունը:
Ցուցարարների պաստառներին վրացերենով գրված է՝ «Պայքարը շարունակվում է»: Սա այս տարվա ցույցի խորհուրդն ու խորագիրն է:
Կազմակերպիչները կոչ են արել պանդեմիայի պայմաններում պահպանել Վրաստանի կառավարության կողմից կորոնավիրուսի տարածման կանխարգելման նպատակով սահմանված կարգավորումները:
Այսօր ավելի վաղ Թբիլիսիի Սուրբ Էջմիածին եկեղեցում Հայոց Ցեղասպանության սրբադասված զոհերի հիշատակի ոգեկոչման պատարագ է մատուցվել: Նախօրեին՝ ավանդական ջահերով երթը կայացել է միայն Աքալքալաքում ու Ախալցիխեում:
Հիշեցնենք` նախորդ տարի Վրաստանում այս շրջանում խիստ կարանտին էր, ինչի պատճառով Հայոց Ցեղասպանության հիշատակի միջոցառումները չեղարկվել էին:
