Ամերիկայի Միացյալ Նահանգների ռազմածովային ուժերի «Դոնալդ Կուկ» (USS Donald Cook – DDG-75) նավը մտել է Վրաստանի տարածքային ջրեր: Բաթումի նավահանգստում նավին դիմավորել են Վրաստանի ներքին գործերի նախարարության, սահմանային ոստիկանության առափնյա պաշտպանության վարչության տնօրեն, առաջին կարգի կապիտան, Ռամազ Պապիձեն և վարչության այլ աշխատակիցներ:
Այս մասին հայտնում է «Նովոստի Գրուզիան»։
Ըստ Վրաստանի ներքին գործերի նախարարության՝ ամերիկյան ռազմանավի այցը նպատակ ունի ընդգծելու Միացյալ Նահանգների և Վրաստանի միջև ընթացող ծովային համագործակցությունը, ինչպես նաև տարածաշրջանում խաղաղության և կայունության խթանումը:
«Դոնալդ Կուկ»-ի անձնակազմի և Վրաստանի առափնյա պահպանության ծառայության ներկայացուցիչների մասնակցությամբ նախատեսվում է համատեղ զորավարժություն: Միաժամանակ նշվում է, որ COVID-19- ի տարածման սպառնալիքի պատճառով ամերիկացի զինվորականների հետ բոլոր հանդիպումները կանցկացվեն հեռակա կարգով:
Նավը Վրաստանի տարածքային ջրերից կհեռանա վաղը ՝ փետրվարի 6-ին:
