2020թ.-ի սեպտեմբների 20-ից Հայաստանում ֆրանսիական համալսարանն ունի նոր ռեկտոր՝ ի դեմս պրոֆեսոր Բերտրան Վենարի: Մինչ այս Բերտրան Վենարը դասավանդել է Օքսֆորդի համալսարանում (Մեծ Բրիտանիա) և Աուդենսիա բիզնես դպրոցում (Ֆրանսիա): Նա զբաղեցրել է տարբեր վարչական պաշտոններ բարձրագույն կրթության բնագավառում, ինչպես օրինակ՝ բիզնես դպրոցի հետազոտությունների գծով տնօրեն, հոգաբարձուների խորհրդի անդամ և կառավարման դպրոցի տնօրեն: Իննսունականներին Հո Չի Մին քաղաքում հիմնել է CFVG դպրոցը, որն այժմ Վիետնամի առաջատար բիզնես դպրոցներից է: Եղել է հրավիրյալ դասախոս Wharton-ի բիզնես դպրոցում (Փենսիլվանիայի համալսարան), IESE-ում (Իսպանիա), Լոնդոնի բիզնես դպրոցում և Քեմբրիջի համալսարանում:
Իր հետազոտությունների համար նրան շնորհվել է Սլոանի կրթաթոշակ (ԱՄՆ), Բարձրագույն կրթության ակադեմիայի հիմնական կրթաթոշակ (Մեծ Բրիտանիա), ինչպես նաև հեղինակավոր Marie Skłodowska-Curie կրթաթոշակ (Եվրոպական միություն)՝ երկու անգամ: 2002 թվականից պրոֆեսոր Բերտրան Վենարի անունը նշվում է « Who’s Who in the World » հանրագիտարանների շարքում, որտեղ ներկայացվում են աշխարհի ամենաազդեցիկ անհատները: 2008-ին Ֆրանսիայի կրթության նախարարությունը նրան շնորհել է « Ակադեմիական դափնիների » ասպետի շքանշան, որը համալսարանականներին տրվող Ֆրանսիայի ասպետության շքանշան է: Նրա հետազոտական աշխատանքները վերաբերում են տնտեսական կեղծիքներին, կիբերանվտանգությանը, կոռուպցիային, հատկապես զարգացող երկրներում:
Հայաստանում ֆրանսիական համալսարանը (ՀՖՀՀ) Հայաստանի առաջատար բարձրագույն ուսումնական հաստատություններից մեկն է, որը շնորհում է երկու պետական դիպլոմ՝ հայկական և ֆրանսիական: Համալսարանի ակադեմիական գործընկերներն են Ժան Մուլեն Լիոն 3 համալսարանը (որի բակալավրի և մագիստրատուրայի ծրագրերը Eduniversal 2018-2019թթ. ցանկի լավագույն հնգյակում են https://www.univ-lyon3.fr/) և Թուլուզ 3 Պոլ Սաբատիե համալսարանը (աշխարհի լավագույն համալսարանների ցանկի 45-րդ հորիզոնական http://www.univ-tlse3.fr/)։ ՀՖՀՀ-ն ներկայումս ունի ավելի քան 1300 ուսանող, 12 դոկտորանտ և ավելի քան 2500 շրջանավարտ։ ՀՖՀՀ-ի հաջողության վկայականն է շրջանավարտների աշխատանքի տեղավորման ցուցանիշը: Ըստ 2005-2019 ուստարիների շրջանավարտների շրջանում անցկացված հարցման՝ վերջիններիս 92%-ն ապահովված է աշխատանքով:
