Կառավարության այսօրվա՝ հոկտեմբերի 24-ի հերթական նիստի ընթացքում, աշխատանքի և սոցիալական հարցերի նախարար Զարուհի Բաթոյանը կներկայացնի ծրագրի նախագիծը, որով նախատեսվում է կյանքի դժվարին իրավիճակում հայտնված երեխաներին, տարեցներին և հաշմանդամություն ունեցող անձանց մատուցվող խնամքի ծառայություները պետական վկայագրի միջոցով տրամադրելու:
Առաջարկվում է, որ յուրաքանչյուր շահառուի՝ իր գնահատված կարիքին համապատասխան, տրամադրվում է մեկ պետական վկայագիր: Պետական վկայագրի հիման վրա շահառուին խնամքի ծառայությունները կտրամադրվեն հավաստագրված՝ սոցիալական ծառայություններ տրամադրող կազմակերպությունների կողմից:
Պետական վկայագրի հիման վրա կազմակերպությունը կտրամադրի խնամք :
Նախագծի հիմնավորման մեջ նշվում է, որ պետական վկայագրի միջոցով ծառայություն ստանալը կընտրի շահառուն կամ նրա օրինական ներկայացուցիչը կամ խնամակալության մարմինը: Շահառուն կամ նրա օրինական ներկայացուցիչը խնամքի ծառայությունից օգտվելու նպատակով պետական վկայագիր ստանալու համար առձեռն կամ փոստային կապի միջոցով կամ առցանց (էլեկտրոնային) եղանակով կարող է դիմել՝
1) երեխաներին շուրջօրյա խնամք տրամադրելու դեպքերում՝ նախարարություն, որը պետական վկայագիրը տրամադրում է ՀՀ մարզպետարանի (Երևանի քաղաքապետարանի) կողմից տրված՝ երեխային շուրջօրյա խնամք տրամադրելու վերաբերյալ եզրակացության հիման վրա.
2) երեխաներին ցերեկային խնամք տրամադրելու դեպքերում՝ սոցիալական աջակցության տարածքային մարմիններին.
3) տարեցներին և հաշմանդամություն ունեցող անձանց խնամք (շուրջօրյա, տնային պայմաններում) տրամադրելու դեպքերում՝ ՍԱՏՄ:
Շահառուի դիմումը ստանալուց հետո,երեխաների շուրջօրյա խնամքի դեպքում՝ նախարարությունը, իսկ մնացած դեպքերում՝ ՍԱՏՄ-ն կկազմակերպեն խնամքի տրամադրման գործընթացը՝ շահառուին տրամադրելով պետական վկայագիր և այդ մասին ՍԱՏՄ-ն գրավոր 3 աշխատանքային օրվա ընթացքում տեղեկացնելով նախարարությանը:
