Երեկ` դեկտեմբերի 13-ին, Շիրակի մարզի ընդհանուր իրավասության դատարանում պետք է շարունակվեր զինվորական կենսաթոշակ ստանալու իրավունք ձեռք բերելու համար խարդախության և փաստաթղթերի կեղծիք կատարելու մեջ մեղադրվող Հովհաննես Բաղդասարյանի գործով դատական նիստը: Դատարանը պետք է ունկնդրեր կողմերի ճառերը, որը ամբաստանյալի հիվանդության պատճառով արդեն մի քանի անգամ հետաձգվել է: Սակայն ամբաստանյալի դատական նիստին չնեկայանալու պատճառով դատական նիստը դարձյալ հետաձգվեց` մինչև ժամը 15:00-ն, ապա 16:00-ն: Սակայն ամբաստանյալն այդպես էլ չներկայացավ դատական նիստին: Վերջինիս պաշտպանի խոսքերով ամբաստանյալ Հովհաննես Բաղդասարյանը վատառողջ է:
Դատարանը հետամուտ եղավ պարզելու` ամբաստանյալի հիվանդ լինելու փաստը, քանի որ բազմիցս եղել է դեպք, երբ ամբաստանյալը չի ներկայացել դատական նիստին` պատճառաբանելով հիվանդ լինելու հանգամանքը, սակայն երբևէ հիվանդ լինելու փաստը հավաստող փաստաթուղթ չի ներկայացրել:
Զանգի միջոցով դատարանը պարզեց, որ ամբաստանյալի հարազատների կողմից Գյումրու շտաբ բուժօգնության կայան զանգ է գրանցվել և բուժօգնություն է ցուցաբերվել Հովհաննես Բաղդասարյանին:
Թե ինչ պատիժ է միջնորդելու պետմեղադրողը` պետությանը 3.064.228 դրամ վնաս պատճառելու համար, պարզ կդառնա դեկտեմբերի 17-ին ժամը 11:30-ին:
Հանրային թղթակից` Լուսաբեր Տեր-Գևորգյան
Աղբյուրը` Իրավաբան.net
