Շուրջ 3 տարի կալանքի տակ գտնվող 28-ամյա Աշոտ Առուշանյանի գործով շուտով գանգատ կուղարկվի Մարդու իրավունքների եվրոպական դատարան. այս մասին Իրավաբան.net-ին հայտնեց Աշոտ Առուշանյանի փաստաբան Լիպարիտ Սիմոնյանը:
«Վճռաբեկ դատարանը մերժեց բողոքը վարույթ ընդունել: Եվ այժմ մի քանի ճշտումներ ունեմ կատարելու, որից հետո հաջորդ քայլս կլինի դիմել Եվրոպական դատարան»,-ասաց փաստաբանը:
Ինչ վերաբերվում է Աշոտի ծնողների և հարազատների կազմակերպված բողոքի ակցիաներին, Լ. Սիմոնյանը հայտնեց, որ թեև նման ակցիաներն այլևս անօոգւտ են, սակայն ծնողները կշարունակեն իրենց բողոքի ձայնը բարձրացնել:
Հիշեցնենք` որ Աշոտ Առուշանյանն Էդգար Կարաքեշիշյանը մեղադրվում են «Մանանա Գրեյն» ՍՊԸ փոխտնօրեն Արմեն Մանուկյանի ավտոմեքենայից 56 միլիոն 400 000 դրամի գողություն կատարելու մեջ:
Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը Էդգար Կարաքեշիշյանին և Աշոտ Առուշանյանին մեղավոր է ճանաչել ՀՀ քրեական օրենսգրքի 177-րդ հոդվածի 3-րդ մասի 1-ին կետով (առանձնապես խոշոր չափերով կատարված գողությունը, որի համար նախատեսվում է ազատազրկում` 4-ից 8 տարի ժամկետով) և դատապարտել ազատազրկման Էդգար Կարաքեշիշյանին 7 տարի, իսկ Աշոտ Առուշանյանին 5 տարի 6 ամիս ժամկետով:
