Այսօր «Կասեցում» շարժման անդամները բողոքի ակցիա իրականացրեցին ՀՀ կառավարության դիմաց, որից հետո Նալաբանդյան փողոցով կազմակերպված երթի միջոցով շարժվեցին ՀՀ ոստիկանություն և պահանջներ ներկայացրեցին ՀՀ ոստիկանապետին` առաջիկա օրերի ընթացքում բացահայտել «Կասեցում» շարժման ղեկավար, ԲՀԿ անդամ Արտակ Խաչատրյանի նկատմամբ կատարված բռնության կազմակերպիչներին ու կատարողներին: Ակցիային մասնակցում էին նաև ԲՀԿ, ՀԱԿ և «Ժառանգություն» խմբակցությունների պատգամավորներ:
Ակցիային և երթին մասնակցում էին նաև ՀՀ ԱԺ մի խումբ պատգամավորներ: Երթի մասնակիցները վանկարկում էին. «Մենք բոլորս Արտակ Խաչատրյան ենք»։
ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը նշեց, որ իրենք պահանջում են բացահայտել Արտակ Խաչատրյանի նկատմամբ կատարված ցինիկ և լկտի հանցագործության կատարողներին ու պատվիրատուներին: Նա հայտարարեց, որ եթե սեղմ ժամկետներում Արտակ Խաչատրյանի գործը չբացահայտվի և նրան ծեծի ենթարկողները պատժի չենթարկվեն, կուսակցությունը ներկայացնելու է բազմաթիվ հրաժարականների պահանջներ:
Արտակ Խաչատրյանի եղբայր Արտյոմ Խաչատրյանը, դիմելով ՀՀ ոստիկանապետին, պահանջեց կատարել իր խոստումը և բացահայտել եղբոր նկատմամբ կատարված հանցագործությունը, քանի որ ոստիկանապետը իր ելույթներում միշտ հորդորել է պաշտպանել մեր ժողովրդին:
Հիշեցնենք` Արտակ Խաչատրյանին փետրվարի 7-ին անհայտ անձիք առևանգել են և ծեծի ենթարկել, փաստի առթիվ հարուցվել է քրեական գործ: Նա «Կասեցում» շարժման շրջանակներում պայքարում էր «Շրջանառության հարկի մասին» ՀՀ օրենքի վիճահարույց դրույթների դեմ:
