ՀՀ կառավարության նոյեմբերի 27-ի նիստին Արդարադատության նախարար Հովհաննես Մանուկյանը ներկայացրեց ՀՀ օրենքների նախագծերի փաթեթ, որի ընդունումից հետո, նախարարի խոսքերով, անվավեր կճանաչվեն տասնյակ հազարավոր քաղաքացիների վարչական տուգանքները: Պարոն Մանուկյանը նիստին ասել էր, որ փաթեթով նախատեսվում է անվավեր ճանաչել այն բոլոր վարչական ակտերը, որոնց հասցեատերերը պատշաճ կերպով չեն ծանուցվել: Այս փաթեթում ընդգրկված է նաև Ճանապարհային ոստկանության կողմից կազմված ակտեր: Նախարարի խոսքերով` անվավեր կճանաչվեն շուրջ 2 միլիարդ դրամի տուգանքներ:
Դեկտեմբերի 15-ին «Վարչարարության հիմունքների և վարչական վարույթի մասին» օրենքում փոփոխություններով և լրացումներ կատարելու մասին» օրենքն ընդունվեց ԱԺ-ի կողմից: Այս առնչությամբ Իրավաբան.net-ը զրուցել է ՀՀ արդարադատության նախարարության Օրենսդրության վերլուծության և կատարելագործման վարչության պետ Լիպարիտ Դրմոյանի հետ:
Պարոն Դրմոյանը պարզաբանեց, որ փաթեթը միտված է այն կարևոր հարցի լուծմանը, որը ծագեց անբողոքարկելի վարչական ակտերը միանգամից հարկադիր կատարման ուղարկելու ժամանակ. «Կարգավորումը հետևյալն է` սահմանվում է շեմ, որը 200 հազարն է լինելու, այն վարչական ակտերը, որոնք 200 հազար դրամ գերազանցող չափով են տույժ նախատեսում քաղաքացիների և իրավաբանական անձանց համար, դրանցով գումարների բռնագանձում կարելի է իրականացնել դատական քննությամբ: Տվյալ պարագայում ի կատար կածվի բռնագանձման վերաբերյալ դատական ակտը, այլ ոչ թե վարչական ակտը: Բացի այդ, սահմանափակում է նախատեսվում, որ բացառապես դատական կարգով պետք է իրականացվեն վարչական ակտերով նախատեսված գումարների բռնագանձումը, երբ այն տարածվում է անձի միակ կացարանի վրա: Այս քայլով քաղաքացուն վերջին բնակության վայրից զրկելու գործընթացը կիրականացվի դատական կարգով, որ թե արտադատական ընթացակարգով»:
Վարչական ակտերի մասով պարոն Դրմոյանը հստակեցրեց. «Օրենքը նախատեսում է, որ մինչև 2012թ.-ը կայացված ակտերի պարագայում քաղաքացիները միայն մայր գումարները վճարելով կազատվեն դրանցով հավելյալ տոկոսագումարներից, ավելցուկներից, որոնք չվճարելու արդյունքում կուտակվել են և բազմապատկվել է ակտի գումարը: Օրենքի հետադարձ ուժն ուղղված է մինչև 2012թ. ընդունված այդ ակտերով միայն մայր գումարների բռնագանձմանը»,- տեղեկացրեց պարոն Դրմոյանը` հավելելով, որ այս ակտերի շարքին են դասվում բազմաթիվ ՃՈ տուգանքներ:
Տեղեկացնենք նաև, որ ԱԺ-ի ընդունումից հետո օրենքը պետք է ստորագրի նաև ՀՀ նախագահը, որից հետո այն հրապարակվելու է պաշտոնական տեղեկագրում և այդ պահից սկսած 10-րդ օրը այն կմտնի ուժի մեջ:
