Հայաստանի Հանրապետության գլխավոր դատախազ Աննա Վարդապետյանը ստորագրել է հրաման Կիմ Հարությունյանին զբաղեցրած պաշտոնից ազատելու մասին: Iravaban.net-ը տեղեկանում է ՀՀ գլխավոր դատախազությունից:
Համաձայն սեպտեմբերի 2-ին ստորագրված №375-Ա հրամանի՝ Հայաստանի Հանրապետության գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ, առաջին դասի խորհրդական Կիմ Արամի Հարությունյանն ազատվել է զբաղեցրած պաշտոնից սեփական դիմումի համաձայն՝ սեպտեմբերի 2-ից:
Հրամանը ստորագրվել է՝ հիմք ընդունելով Կ. Հարությունյանի դիմումը և ղեկավարվելով «Դատախազության մասին» ՀՀ օրենքի 9-րդ հոդվածի 2-րդ մասի 7-րդ կետով, 30-րդ հոդվածի 3-րդ մասով և 62-րդ հոդվածի 1-ին մասի 1-ին կետով:
Հրամանով Հայաստանի Հանրապետության դատախազության ֆինանսատնտեսական վարչությանը հանձնարարվել է կատարել վերջնահաշվարկ Հայաստանի Հանրապետության օրենսդրությամբ սահմանված կարգով:
Ինչպես արդեն տեղեկացրել է Iravaban.net-ը, 2025 թվականի օգոստոսի 3-ին Կիմ Հարությունյանը նշանակվել է ՀՀ քննչական կոմիտեի Երևան քաղաքի քննչական վարչության պետի տեղակալ։
Ստորև ներկայացնում ենք Կիմ Արայի Հարությունյանի կենսագրությունը.
Ծնվել է 1993թ. սեպտեմբերի 3-ին Սյունիքի մարզի Գորիս քաղաքում:
Աշխատանքային գործունեություն
2024-2025թթ. – ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության դատախազ,
I-III.2024թ. – ՀՀ գլխավոր դատախազության միջազգային-իրավական համագործակցության վարչության դատախազ,
2022-2024թթ. – ՀՀ գլխավոր դատախազության ՀՀ ազգային անվտանգության ծառայությունում մինչդատական վարույթի օրինականության նկատմամբ հսկողության վարչության դատախազ,
I-I.2022թ. – ՀՀ զինվորական կենտրոնական դատախազության կայազորների զինվորական դատախազությունների գործունեության նկատմաբ վերահսկողության բաժնի դատախազ,
2020-2022թթ. – Երևանի կայազորի զինվորական դատախազության ավագ դատախազ,
2019-2020թթ. – Թիվ 2 կայազորի զինվորական դատախազության ավագ դատախազ,
2018-2019թթ. – Թիվ 2 կայազորի զինվորական դատախազության դատախազ,
2017-2018թթ. – ՀՀ քննչական կոմիտեի դեպարտամենտի հատկապես կարևոր գործերի քննության գլխավոր վարչության քրեական գործերի թվայնացնող և պատճենահանող:
Կրթություն
2014 թվականին ավարտել է Երևանի պետական համալսարանի իրավագիտության ֆակուլտետի բակալավրիատը, իսկ 2016 թվականին՝ մագիստրատուրան:
Պարգևներ
Խրախուսվել գերատեսչական տարբեր պարգևներով:
Այլ տվյալներ
Ամուսնացած է:
