Iravaban.net-ի փոխանցմամբ՝ այս նիստին պատասխանողեր Սեդրակ Քոչարյանի և Զարուհի Բադալյանի ներկայացուցիչ Հարություն Հարությունյանը ներկայացրեց արագացված դատաքննություն կիրառելու և հայցն ակնհայտ անհիմն լինելու հիմքով մերժելու մասին միջնորդություն։

Բերված միջնորդությամբ՝ փաստաբանն անդրադարձավ կատարված ուսումնասիրությանը, Սեդրակ Քոչարյանին 2019 թվականի փետրվարի 15-ին որպես մեղադրյալ գործին ներգրավվելուն ու ՍԴ որոշմանը․ «Այն հանցավոր արարքը, որը վերագրվում է Սեդրակ Քոչարյանին, դրա հիմքն ամբողջությամբ դատարանի ուժի մեջ մտած ակտով վերացված է, ու մեղադրանքի հիմք այլևս գոյություն չունի»,-ասաց Հարությունյանը՝ ընդգծելով, որ ներկայացված հայցադիմումով բացակայում է որևէ փաստ, որը հիմք կարող է հանդիսանալ պնդելու, որ ենթադրյալ հանցագործության ու հնարավոր տնտեսական ակտիվների ավելացման միջև կա պատճառահետևանքային կապ։

Նա նշեց, որ այս դեպքում գործ ունեն քրեական վարույթի հիման վրա ներկայացված հայցի հետ, իսկ ՍԴ որոշմամբ արձանագրվել է՝ ապօրինի ծագում ունեցող գործերով պատճառահետևանքային կապի անհրաժեշտությունը պարտադիր է։

«Ունենք իրավիճակ, երբ այս հայցի պատճառով իմ վստահորդներին պատկանող գրեթե բոլոր սեփականության օբյեկտներն արգելադրված են՝ հնարավոր բարենպաստ դատական ակտի դեպքում կատարման խոչընդոտ չառաջացնելու պատճառաբանությամբ»,-ասաց փաստաբանը։

Պատասխանողների մյուս ներկայացուցիչ Արամ Օրբելյանը ևս արագացված դատաքննություն կիրառելու վերաբերյալ միջնորդություն ներկայացրեց։

Սամանադրական դատարանի կողմից ապրիլի 16-ին հրապարակված որոշմանը հղում կատարելով՝ Օրբելյանն ասաց, որ այս գործով ներկայացված հայցադիմումի բոլոր պահանջների, այդ թվում՝ «Թարգեթ գրուպ» ՓԲԸ-ի մասնակցության 96․8 %-ը, ինչպես նաև այդ ընկերության տրամադրված փոխառությունների չմարված մասերը բռնագանձելու պահանջների հիմքում դրված չէ որևէ փաստարկ այդ պահանջների և Սեդրակ Քոչարյանի՝ ենթադրյալ հանցավոր արարքի միջև։

«Հայցադիմումով չի հիմնավորվել այդ պահանջների ներկայացմամբ ենթադրյալ հանցագործության արդյունքում ստացված գույքի բռնագանձումը, և արդյունքում այն չի կարող դիտարկվել որպես հանցավորության դեմ պայքարի նպատակ հետապնդող գործողություն»,-նշեց նա։

Օրբելյանի խոսքով՝ այստեղ գործ ունեն հիմնավորվածության հետ, և պետք է ապացուցվի գույքի՝ հանցագործության արդյունքում ձեռք բերված լինելու ուղիղ կապը։

Հայցվորի ներկայացուցիչ, դատախազ Համլետ Հարությունյանը միջնորդեց դատական նիստը հետաձգել՝ ժամանակ խնդրելով ներկայացված միջնորդություններին ծանոթանալու ու դիրքորոշում հայտնելու համար։

Հաջորդ նիստի օր նշանակվեց հունիսի 24-ը։

Մանրամասները՝ տեսանյութում։

Մարիամ Շահնազարյան