Հակակոռուպցիոն քաղաքացիական դատարանում տեղի ունեցավ Քաղաքաշինության կոմիտեի նախկին նախագահ, Ստեփանավան քաղաքի նախկին գլխավոր ճարտարապետ Վահագն Վերմիշյանի՝ ենթադրյալ ապօրինի ծագում ունեցող գույքի բռնագանձման գործով նիստը։ Այն նախագահում է դատավոր Կարապետ Բադալյանը։

Iravaban.net-ի հետ զրույցում Վերմիշյանի ներկայացուցիչ, փաստաբան Արմեն Մելքումյանն ասաց, որ այս նիստին միջնորդել են, որպեսզի դատարանի վարույթում գտնվող Վահագն, Մարգարիտ և Սուսաննա Վերմիշյանների, վեճի առարկայի նկատմամբ ինքնուրույն պահանջներ չներկայացնող երրորդ անձանց՝ «Ամերիաբանկ» ՓԲԸ և «Արդշինբանկ» ՓԲԸ, ապօրինի ծագում ունեցող գույքի բռնագանձման պահանջի մասին  քաղաքացիական գործի վարույթը կարճվի։

Պատասխանողների ներկայացուցիչների խոսքով՝ այն պարագայում, երբ հայցվորի կողմից Վերմիշյանի և նրա ընտանիքի անդամների նկատմամբ ուսումնասիրությունը սկսելու, այնուհետև հայցադիմումը ներկայացնելու նպատակը եղել է «հանրային շահ» հանդիսացող հանրային ծառայության ոլորտում կոռուպցիայի կանխարգելումը և դրա դեմ պայքարը, ապա պատասխանող կողմից առավելագույնը կարող է բռնագանձվել

• միայն 2019 թվականի մարտի 21-ից հետո ձեռք բերված գույքը, այդ թվում՝ դրամական միջոցները, որոնց ծագման օրինականությունը չի հիմնավորովում քաղաքացիական գործում առկա և պատասխանող կողմի ներկայացուցիչների կողմից ներկայացված ապացույցներով,
• 2019 թվականի սեպտեմբեր ամսից հետո ձեռք բերված այն գույքը, այդ թվում՝ դրամական միջոցները, որոնց ծագումը պատճառահետևանքային կապ ունի Վ․Վեմիշյանին վերագրվող հանցնաքների կատարման հետ։ Ավելին, Վ․Վերմիշյանին վերագրվող հանցանքների և բռնագանձման առարկա հանդիսացող գույքի առաջացման միջև պատճառահետևանքային կապը պետք է հաղթահարի «հիմնավոր կասկածից անդին» ապացուցողական շեմը, որի հաղթահարման հստակ պայմաները ի թիվս այլնի սահմանված են ՄԻԵԴ նախադեպային որոշումներում։

Էական հանգամանքներ վկայակոչելով՝ պատասխանողները խնդրել են բավարարել ներկայացված միջնորդությունը, իսկ հայցվորի ներկայացուցիչը ժամանակ է խնդրել դրան ծանոթանալու, ամբողջական դիրքորոշում հայտնելու համար։

Գործով հաջորդ նիստի օր է նշանակվել մայիսի 27-ին։

Ավելի վաղ Iravaban.net-ի հետ զրույցում Վերմիշյանի ներկայացուցիչները խոսել են ՍԴ որոշման, դրա հետագա ազդեցության, այս գործի կարճման հնարավորության մասին։

Տեսանյութը՝ այստեղ։