Հովսեփ Խուրշուդյանի ելույթը Լեհաստանի Ժեշով քաղաքում տեղի ունեցած Արևելյան գործընկերության տարածաշրջանային և տեղական իշխանությունների համաժողովի (CORLEAP) 13-րդ տարեկան հանդիպման ժամանակ։
«Հարգելի CORLEAP անդամներ և 13-րդ CORLEAP տարեկան հանդիպման հյուրեր: Շնորհակալություն հանդիպմանը ներկա գտնվելու համար ինձ հրավիրելու համար։ Արևելյան գործընկերության Քաղաքացիական հասարակության ֆորումը պատրաստակամ է խորացնելու համագործակցությունը CORLEAP-ի հետ կրթության, տեղական ինքնակառավարման ոլորտում քաղաքացիական հասարակության և, հատկապես, երիտասարդների ներգրավվածության հարցում, համայնքների ներուժի բացահայտման և ԱլԳ տարածաշրջանում տեղական ինքնակառավարման արդյունավետության ավելացման հարցում՝ եվրոպական լավագույն փորձի փոխանակման եւ ԱլԳ երկրների տեղական ինքնակառավարման պաշտոնյաների՝ տեղական ինքնակառավարման ոլորտում ԵՄ չափանիշներին ծանոթացնելու միջոցով: Այս առումով ԱլԳ ՔՀՖ-ն պատրաստ է համագործակցել CORLEAP-ի հետ՝ CORLEAP Ակադեմիայի ձեւավորման գործում:
Մենք ապրում ենք դժվար ժամանակներում՝ լի սպառնալիքներով ու մարտահրավերներով, որոնք գալիս են ոչ միայն Եվրոպայի սահմաններից, ինչպես Ռուսաստանի դեպքում է, այլև Եվրոպայի մեծ հաշվով Արևմուտքի ներսից, այդ թվում՝ Արևելյան գործընկերության տարածաշրջանի ներսից։ Ես նկատի ունեմ Ադրբեջանի և Բելառուսի բռնատիրական ռեժիմները։ Կարծում եմ, որ Եվրոպան չի կարող դիմակայել այդ սպառնալիքներին առանց իրական համախմբման։ Զինվող ավտոկրատիաներին զսպելու համար նրանց դեմ միայն պատժամիջոցներ կիրառելը բավարար չէ: Այսպիսով, ժողովրդավարությունը, մարդու իրավունքները, միջազգային իրավունքը և աշխարհակարգը պաշտպանելու համար կարծում եմ, որ Եվրոպան նախ պետք է հավատա իր ուժերին, ավելի միասնական լինի և զինվի:
Քաղաքական կուսակցությունները, համայնքների ղեկավարները և տեղական իշխանությունները պետք է ժողովրդին բացատրեն միասնության և միասնական դիմադրության, եվրոսկեպտիցիզմը հաղթահարելու և Ուկրաինային ավելի մեծ աջակցություն տրամադրելու անհրաժեշտությունը՝ ռուս ագրեսորին հաղթելու համար:
Քաղաքացիական հասարակությունները ԱլԳ երկրներում գտնվում են շարունակական պայքարի մեջ։ Անցյալ տարի Մոլդովայի քաղաքացիական հասարակությունը, ժողովրդավարական քաղաքական ուժերի հետ միասին, հաղթահարեց Մոլդովայի քաղաքական գործընթացին միջամտելու և եվրաինտեգրման գործընթացին վնասելու ռուսաստանյան փորձը։ Սակայն այս տարի խորհրդարանական ընտրությունների ժամանակ նոր մարտահրավեր է սպասվում։ Վրաստանի քաղաքացիական հասարակությունը շարունակում է իր պայքարը ժողովրդավարության, ազատ ընտրությունների և իր երկրի եվրոպական ընտրության համար: Երկրում թե երկրից դուրս՝ Բելառուսի քաղաքացիական հասարակությունը պատրաստվում է պայքարել ժողովրդավարության և ազատ Բելառուսի համար առաջիկա ընտրությունների ժամանակ, որոնք տեղի կունենան 5 օրից։ Ուկրաինայի քաղաքացիական հասարակությունը, Ուկրաինայի ժողովրդի հետ միասին և որպես նրա մաս, շարունակում է գոյաբանական պատերազմը հանուն ազատության և ինքնիշխանության՝ պայքարելով ողջ Եվրոպայի անվտանգության համար։
Հայաստանում քաղաքացիական հասարակությունը, համագործակցելով ժողովրդավարական քաղաքական ուժերի հետ, նախաձեռնեց ստորագրահավաք Հայաստանի՝ ԵՄ-ին անդամակցելու գործընթաց մեկնարկելու օրենքի նախագծի շուրջ։ Մենք հաջողեցինք՝ հավաքելով անհրաժեշտ 50000-ից ավելի ստորագրություն։ Շուտով այս օրենքը կընդունվի խորհրդարանի կողմից, իսկ ԵՄ անդամակցության ուղենիշը կդառնա Հայաստանի Հանրապետության պաշտոնական արտաքին քաղաքականություն։ Ուստի կոչ եմ անում CORLEAP-ի անդամներին, ԵՄ-ի և ԱլԳ պաշտոնյաներին ողջունել և աջակցել այս գործընթացը:
Հարգելի գործընկերներ, ԱլԳ ՔՀՖ-ի անունից CORLEAP-ի 13-րդ տարեկան հանդիպմանը մաղթում եմ արդյունավետ աշխատանք»,-նշված է հայտարարության մեջ:
