Այսօր Բելառուսում մեկնարկել են նախագահական ընտրությունները։ Ընտրատեղամասերը բաց կլինեն ժամը 08:00-ից մինչև 20:00-ն․ հայտնում է РИА Новости-ն։
Ընտրացուցակներում ընդգրկված է ավելի քան 6,9 մլն մարդ։ Նշվում է, որ արտերկրում այս ընտրությունների համար ընտրատեղամասեր չեն բացվելու։ Իշխանությունները դա բացատրել են նրանով, որ չեն կարողանա ապահովել անվտանգությունը, ինչպես նաև 2020 թվականի նախագահական ընտրություններից հետո Արևմուտքի հետ հարաբերությունների վատթարացման և ընդդիմության բողոքի ակցիաները ճնշելու պատճառով դիվանագիտական կորպուսի կրճատմամբ։
Բելառուսի նախագահի պաշտոնին հավակնում է 5 թեկնածու. պետության ներկայիս ղեկավար Ալեքսանդր Լուկաշենկոն, Բելառուսի Լիբերալ-դեմոկրատական կուսակցության առաջնորդ Օլեգ Գայդուկևիչը, Աշխատանքի և արդարության հանրապետական կուսակցության առաջնորդ Ալեքսանդր Խիժնյակը, Բելառուսի Կոմկուսի Կենտկոմի առաջին քարտուղար Սերգեյ Սիրանկովը, նախորդ ընտրությունների նախկին թեկնածու, ձեռներեց, անկուսակցական Աննա Կանոպացկայան։
