Կրթության, գիտության,մշակույթի և սպորտի նախարարությունը հանրային քննարկման է ներկայացրել նախագիծ, որով առաջարկվում է Նավասարդ Հակոբյանին ազատել պարտադիր զինվորական ծառայությունից` hաշվի առնելով Նավասարդ Հակոբյանի անցած ստեղծագործական ուղին, նրա ներդրումը հայ մշակույթում, ինչպես նաև Հայաստանն ու հայ մշակույթը միջազգային հարթակներում ըստ արժանավույն ներկայացնելը և խոստումնալից ապագան
Կառավարության որոշման նախագծում մասնավորապես ասվում է․
«Ղեկավարվելով «Զինվորական ծառայության և զինծառայողի կարգավիճակի մասին» օրենքի 21‑րդ հոդվածի 5-րդ մասի և Հայաստանի Հանրապետության կառավարության 2019 թվականի փետրվարի 15-ի N 89-Ն որոշման հավելվածի 2-րդ կետի 1-ին ենթակետի պահանջներով` Հայաստանի Հանրապետության կառավարությունը որոշում է.
- Շարքային կազմի պարտադիր զինվորական ծառայությունից ազատել Նավասարդ Կամոյի Հակոբյանին (ծնվ.՝ 1998 թվականի հունիսի 5-ին)»:
Նախագծի հիմնավորման մեջ նշվում է, որ Նավասարդ Կամոյի Հակոբյանը սովորել և ավարտել է Երևանի Կոմիտասի անվան պետական կոնսերվատորիան՝ «Կատարողական արվեստ» մասնագիտության «Վոկալ արվեստ՝ ակադեմիական երգեցողություն» մասնագիտացմամբ: ԵՊԿ-ում ուսանելու 2-րդ կուրսից հանդիսացել է Ալ. Սպենդիարյանի անվան օպերայի և բալետի ազգային ակադեմիական թատրոնի՝ երիտասարդական օպերային ծրագրի մենակատար: 2018-2021թթ. թատերաշրջանների ընթացքում հանդես է եկել առաջատար դերերգերով՝ Սիլվիո «Պայացներ», Ժորժ Ժերմոն «Լա Տրավիատա», Բելկորե «Սիրո Ըմպելիք», Անտոնիո «Ճանապարհորդություն դեպի Ռեյմս» օպերաներում և բազմաթիվ համերգային ծրագրերում: 2019 թվականից համագործակցում է Ազգային ֆիլհարմոնիկ նվագախմբի հետ և պարբերաբար հանդես է եկել տարբեր համերգային ծրագրերում: 2022թ. Նավասարդ Հակոբյանը հանդիսանում է երիտասարդ արտիստ՝ Հյուսթոն Գրանդ Օպերայում ԱՄՆ և ներկայացնում է Հայաստանի Հանրապետությունը: Ծրագրի տևողությունը 3 տարի է, որի նպատակն է արտիստին պատրաստ դարձնել միջազգային հեղինակավոր բեմերին:
Նավասարդ Հակոբյանը 2018թ. արժանացել է Հայաստանի Հանրապետության նախագահի մրցանակի: 2019թ. Հայաստանի Հանրապետության կրթության, գիտության, մշակույթի և սպորտի նախարարության կողմից ճանաչվել է Հայաստանի Հանրապետության լավագույն ուսանող:
Նավասարդ Հակոբյանի համար երաշխավորագրեր են ներկայացրել ՀՀ ժողովրդական արտիստներ Բարսեղ Թումանյանը, Ռոբերտ Ամիրխանյանը, Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը, օպերային երգիչ, դաշնակահար, դիրիժոր Պլասիդո Դոմինգոն, Թագավորական օպերայի քասթինգի տնօրեն Մարիո Կատոնան, Մելիսա Վեգները, Սամուել Գելբերը, Էվամարիա Վիեզերը և այլոք:
ՀՀ կառավարության 2020 թվականի օգոստոսի 6-ի N 1300-Ա և 2022 թվականի հունիսի 17-ի N 888-Ա որոշումների համաձայն Նավասարդ Հակոբյանին ստացել է պարտադիր զինվորական ծառայությունից տարկետում:
Նավասարդ Հակոբյանը 2022թվականին տարկետում ստանալուց հետո շարունակել է իր ստեղծագործական գործունեությունը, մասնավորապես՝
- Սուլլիվան հատուկ մրցանակ, 2022, Նյու Յորք, ԱՄՆ.
- Բաթլեր միջազգային մրցույթի հաղթող, 2023, Օսթին, ԱՄՆ.
- Մերլին Հորն մրցույթի հաղթող, 2023, Սանտա Բարբարա, ԱՄՆ.
- Թագուհի Սոնիա Մրցույթի դափնեկիր, 2023, Օսլո, Նորվեգիա.
- Պլասիդո Դոմինգոյի անվան Օպերալիա համաշխարհային մրցույի 3-րդ մրցանակակիր, 2023, Քեյփ-Թաուն, Հարավային Աֆրիկա.
- Պլասիդո Դոմինգոյի Զարզուելա հատուկ մրցանակ, 2023, Քեյփ-Թաուն, Հարավային Աֆրիկա.
- Դալլասի Օպերային թատրոնի միջազգային մրցույթի հաղթող, 2024, Դալլաս, ԱՄՆ.
- Մետրոպոլիտեն Օպերայի Դոմինիկ Լաֆֆոնթ մրցույթի հաղթող, 2024, Նյու Յորք, ԱՄՆ:
Նավասարդ Հակոբյան Պլասիդո Դոմինգոյի անվան Օպերալիա մրցույթից հետո առաջարկ է ստացել Դլասիդո Դոմինգոյից, ով ներկայացնում է Ասկոնաս Հոլտ մենեջերական ընկերությունը, համերգներով հանդես գալու ամբողջ աշխարհում:
Նավասարդ Հակոբյանը 2024թ. հունվարին Հյուսթոնի Գրանդ Օպերայում հանդես է եկել դեբյուտով Շարպելիսի դերերգով Մադամ Բաթերֆլայ Օպերայում, փետրվար ամսին թատրոնի և դերի դեբյուտ Դալլասի Օպերային թատրոնում՝ Գրեգորիոյի դերերգով Ռոմեո և Ջուլիետ օպերայում: Մայիս ասին Պրահայում տեղի է ունեցել Նավասարդ Հակոբյանի մենահամերգը: Նախատեսվում է հանդես գալ Հյուսթոնի ֆիլհարմոնիկ նվագախմբի հետ Նազարեթի դերերգով Սալոմե օպերայում, ապա հունիս ամսին՝ մենահամերգով Սանտա Բարբարայի Հահն հոլում: Նավասարդ Հակոբյանը ամռանը հանդես է գալու աշխարհահռչակ Զալցբուրգ Ֆեստիվալին, որի տևողությունը 2 ամիս է: Աշնանը տեղի է ունենալու իր թատրոնի դեբյուտը Սաքսոնական Դրեզդենի Օպերային թատրոնում՝ Մարչելլոյի դերերգով Բոհեմ օպերայում, իսկ ձմռանը Շոնարի դերերգով Բոհեմ օպերայում՝ Հյուսթոնի Գրանդ օպերայում:
