Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում շարունակվում է 36-ամյա Բավական Սմբատի Խաչատրյանին առաջադրված մեղադրանքի քննությունը:

Ամբաստանյալը մեղադրվում է շահագործման նպատակով մարդկանց հավաքագրելու  և վերջիններիս սեռական շահագործումը կազմակերպելու համար:

Նշված գործով կա 5 տուժող՝ 2-ը Երևանից, 2-ը՝ մարզերից, 1-ը՝ ԼՂՀ-ից:

Ինչպես հաղորդում է Դատական տեղեկատվական համակարգը, որպես խափանման միջոց է ընտրվել կալանավորումը:

Բավական Խաչատրյանին մեղադրանք է  առաջադրվել ՀՀ քրեական օրենսգրքի 34-132-րդ հոդվածների համաձայն:

34-րդ հոդվածը սահմանում է, որ հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով:

Ինչպես նաև 132-րդ հոդվածի համաձայն՝ մարդու թրաֆիքինգը կամ շահագործումը, որը կատարվել է կազմակերպված խմբի կողմից, պատժվում է ազատազրկմամբ՝ տասից տասնչորս տարի ժամկետով` գույքի բռնագրավմամբ կամ առանց դրա, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարությանօրենսգրքով սահմանված կարգով` դատարանի` օրինական ուժի մեջ մտած դատավճռով:   

Իրավաբան.net