«Եռաբլուր» զինվորական պանթեոնում ԲԴԽ նախկին նախագահ Գագիկ Ջհանգիրյանը լրագրողների հետ զրույցում նշել է, որ 30 տարի շարունակ բանակում ներդրումներ չեն արվել, հենց այդ պատճառով էլ Հայաստանը պարտվել է 2020 թվականի պատերազմում․ «Եթե ձեր ներսում արձանագրեք, որ մենք պարտվել եք, շատ հարցեր դուրս կգան»։

Նա ասել է, որ բանակում չեն եղել ժամանակակից ՀՕՊ համակարգեր, զենք և զինամթերք, ուշադրություն չի դարձվել անօդաչուներին։

«Թվում էր, թե ինչ-որ մեկը մեզ պետք է պաշտպանի, Ադրբեջանը մեզ պատերազմ չի հայտարարի, չի կռվի։ Պարզվեց, որ բոլոր երաշխիքները սուտ էին։ Կովկասում ամենահզոր բանակը լինելու մասին գնահատականները ճիշտ էին 1994-1997 թվականները, հետագայում երկրի ղեկավարությունն այդ բանակի վրա ուշադրություն չի դարձրել։ Բանակը ժամանակակից զենքով և տեխնիկայով չի զինել»,-նշել է Ջհանգիրյանը՝ հավելելով, որ պատերազմում պարտվելու պատճառներից մեկն էլ ընտրված «հին, սովետական» մարտավարությունն է եղել։

Նրա համոզմամբ` 1999 թվականի հոկտեմբերի 27-ին տեղի ունեցած ողբերգության իրական մեղավորները նստած են, բայց` ոչ բոլորը․ «Հիմա նախաքննությունը վերսկսվել է, Փառք Աստծո, արեք համբերենք»։

Ըստ Ջհանգիրյանի` հիմա պետական, օպերատիվ-հետախուզական, քննչական ու դատախազական բոլոր մարմինները շահագրգիռ են, որ բացահայտվի այդ հանցագործությունը․ «Հուսանք, որ ամեն ինչ կպարզվի»։