Հայաստանն այլևս որևէ ակնկալիք չունի Հավաքական անվտանգության պայմանագրի կազմակերպությունից։ Հանրային հեռուստաընկերության եթերում այս հայտարարությունն արեց ՀՀ անվտանգության խորհրդի քարտուղար Արմեն Գրիգորյանը։
«Մենք որևէ ակնկալիք չունենք ՀԱՊԿ–ից, որովհետև 2022 թվականի սեպտեմբերին կամ դրանից առաջ, երբ Հայաստանի Հանրապետության վրա լայնածավալ հարձակումներ էին տեղի ունեցել (նկատի ունի ադրբեջանական ագրեսիան. խմբ.), դիմել ենք ՀԱՊԿ–ին` ակնկալելով օգնություն, որպեսզի մեր սուվերեն տարածքը պաշտպանվի։ Մենք որևէ ադեկվատ արձագանք չենք ստացել»,– ասաց Գրիգորյանը։
Նրա խոսքով` հենց այդ ամենից հետո հայկական կողմը հասկացել է, որ որևէ օգնություն կամ աջակցություն ակնկալել պետք չէ։
Գրիգորյանը նշեց` երբ կազմակերպությունը հայտարարեց Հայաստան առաքելություն ուղարկելու պատրաստակամության մասին, հայկական կողմը մեկ հարց ուներ՝ կոնկրետ որտե՞ղ են տեղակայվելու ՀԱՊԿ դիտորդները, և որտե՞ղ է անցնում Հայաստանի սահմանը: Հստակ պատասխան չհնչեց։
Արմեն Գրիգորյանը նաև հերքեց այն պնդումները, թե կազմակերպությունը ռազմատեխնիկական օգնություն է առաջարկել Հայաստանին։
