Պորտուգալիայի վարչապետ Անտոնիո Կոստան հրաժարականի դիմում է ներկայացրել երկրի նախագահին՝ լիթիումի և ջրածնի նախագծերի ենթադրյալ կառավարության սխալ կառավարման հետաքննության ֆոնին։ Այս մասին հայտնում է Reuters գործակալությունը՝ հղում կատարելով SIC հեռուստաընկերությանը, փոխանցում է ՏԱՍՍ-ը։
Այս որոշման մասին Կոստան հայտարարել է հանրապետության նախագահ Մարսելո Ռեբելո դե Սոուզայի հետ հանդիպումից հետո հեռուստաուղերձում։ Քաղաքական գործիչն ասել է, որ հետաքննությունն իրեն անակնկալի է բերել, սակայն նրա խիղճը հանգիստ է, և ինքը մտադիր է համագործակցել։
Ավելի վաղ EFE-ն հայտնել էր, որ պորտուգալական ոստիկանությունը խուզարկություններ է իրականացնում վարչապետի պաշտոնական նստավայրում։ Ենթադրվում է, որ որոնումները կապված են հանրապետության հյուսիսում լիթիումի արդյունահանման նախագծերի հետ։ Գործակալության տվյալներով՝ իրավապահները մոտ 40 խուզարկություն են իրականացրել, այդ թվում՝ ենթակառուցվածքների ու շրջակա միջավայրի նախարարություններում։ Կոռուպցիոն կասկածների կապակցությամբ արդեն կալանավորվել են Կոստայի վարչակազմի ղեկավար Վիտոր Էշկարիան և Սինես քաղաքի քաղաքապետը։ Գործով կասկածվում են երկու պորտուգալացի նախարարներ։
