Մայիսի 3-ին ոստիկանության օպերատիվ կառավաման կենտրոն զանգած քաղաքացին հայտնում էր, որ Մալաթիա-Սեբաստիա վարչական շրջանի կրթհամալիրներից մեկի պատուհանի վրա կրակոցի հետքեր կան։
Այս մասին հայտնում են ոստիկանությունից։
Ժամը 13-ին ստացվեց հաջորդ հաղորդումը։ Ոստիկանություն զանգած տղամարդը հայտնում էր, որ ապրիլի 15-ից մայիսի 3-ն ընկած ժամակահատավածում անհայտ անձը օդաճնշիչ ատրճանակով դիտավորությամբ վնասել էր կրթահամալիրի պատուհանների ապակիները՝ պատճառելով 200 000 դրամի վնաս։
Ոստիկանության Երևան քաղաքի վարչության և Մալաթիայի բաժնի քրեական հետախույզներն ու անչափահասների գործերով և ընտանիքում բռնության կանխարգելման բաժանմունքի ծառայողները համատեղ միջոցառումներով պարզեցին հանցագործությունը կատարած անձի ինքնությունը։ Պարզվել է նաև, որ նա նախկինում կատարել էր տարբեր հանցագործություններ։
Մայիսի 4-ին 17-ամյա երիտասարդը հայտնաբերվեց, ձերբակալվեց և տեղափոխվեց ոստիկանության Մալաթիայի բաժին։
Նախաձեռնվել է քրեական վարույթ։ 17-ամյա երևանցին տեղափոխվել է ձերբակալվածների պահման վայր։
Ձեռնարկվում են միջոցառումներ՝ հանցագործության գործիք օդաճնշիչ ատրճանակը հայտանբերելու ուղղությամբ։
Հավելենք, որ խոսքը «Մխիթար Սեբաստացի» կրթահամալիրի մասին է։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
