Վաղ առավոտյան «Դիմադրություն» շարժման մասնակիցները Ֆրանսիայի հրապարակից երթով շարժվեցին Բաղրամյան պողոտա, որտեղ շարժման անդամներն ու նրանց կողմնակիցները շրջափակեցին ՀՀ նախագահի նստավայրը։
Իշխան Սաղաթելյանը դիմելով ներկաներին՝ ասաց, որ իրենց նպատակը է թույլ չտալ աշխատողների մուտքը նախագահական նստավայր։
«Ինչու ենք շրջափակել նախագահականը, որովհետև երկրում մի ամիս է պրոցեսներ են տեղի ունենում, համաժողովրդական շարժում է, իսկ էստեղի նստած անձը իրականությունից կտրված է: Ինքը ոչ թե ՀՀ նախագահն է, այլ ընդամենը ՔՊ-ի ներկայացուցիչն այս շենքում։ Հիմա փակում են բոլոր մուտքերը, արգելափակում ենք նախագահականի գործունեությունը»,-նշել է նա:
«Հայաստան» խմբակցության պատգամավոր Գեղամ Մանուկյանն էլ հայտնեց, որ շարժումն ամեն օր պատրաստվում է պետական տարբեր կառույցների շենքեր շրջափակել։ Այնուհետև «Դիմադրություն» շարժման անդամների և ոստիկանների միջև քաշքշուկ սկսվեց։ Ոստիկանները փորձելով ավելի մեծ ուժեր կուտակել տեղում, հրեցին ակցիայի մասնակիցներին, իսկ վերջիններս վանկարկում են` «Նիկոլ, դավաճան», «Առանց Նիկոլ Հայաստան»։
