Հայ-ադրբեջանական սահմանի սահմանազատման և սահմանագծման հարցում առաջընթացի հասնելը թույլ կտա էականորեն առաջ շարժվել Երևանի և Բաքվի միջև հարաբերությունների նորմալացման հարցում: Այս մասին տեղեկանում ենք ТАСС լրատվական գործակալությունից:
Նշվում է, որ Մոսկվան ելնում է եռակողմ պայմանավորվածությունների կատարման անհրաժեշտությունից: «Առաջնահերթ խնդիրն այսօր հայ-ադրբեջանական սահմանի սահմանազատման և սահմանագծման գործընթացին զարկ տալն է, ինչպես նաև տարածաշրջանի տրանսպորտային և տնտեսական հաղորդակցությունների ապաշրջափակումը: Այս ուղղություններով առաջընթացի հասնելը թույլ կտա առաջ ընթանալ Երևանի և Բաքվի միջև հարաբերությունների կարգավորման գործում»,- ասված է հաղորդագրության մեջ:
ԱԳՆ-ն նաև նշել է, որ այս տարի լրանում է Ռուսաստանի և ԱՊՀ երկրների մեծ մասի, այդ թվում՝ Ադրբեջանի և Հայաստանի միջև դիվանագիտական հարաբերությունների հաստատման 30-ամյակը։ «Յուրաքանչյուր երկրի հետ նախապատրաստում ենք հոբելյանական միջոցառումների շարք: Նկատի ունենալով, որ մի շարք միջոցառումներ կրելու են մշակութային և կրթական բնույթ, դրանք կհետաքրքրեն նաև հանրությանը», -ասված է հաղորդագրության մեջ:
Դիվանագիտական գերատեսչությունը հայտնել է, որ Մոսկվան կոչ է անում որքան հնարավոր է շուտ սկսել Հայաստանի և Ադրբեջանի միջև սահմանի սահմանազատման աշխատանքները։ «Մենք հետևողական ջանքեր ենք գործադրում Ադրբեջանի և Հայաստանի սահմանին իրավիճակը կարգավորելու համար, որտեղ, ցավոք, ժամանակ առ ժամանակ տեղի են ունենում զենքի կիրառման միջադեպեր, լինում են մարդկային զոհեր։ Անհրաժեշտ է ձևավորել և սկսել աշխատանքը։ Ադրբեջանա-հայկական սահմանի սահմանազատման երկկողմ հանձնաժողովը հնարավորինս արագ, որին կհաջորդի մենք պատրաստ ենք խորհրդատվական աջակցություն ցուցաբերել Բաքվին և Երևանին այս գործընթացում»,- ընդգծել են նախարարությունից։
ՌԴ ԱԳՆ-ն նաև հավելել է, որ Ռուսաստանն ակտիվ մասնակցում է ռազմագերիների վերադարձի գործընթացին:
