Հոկտեմբերի 11-ին ՀՀ ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նիստում Էկոնոմիկայի փոխնախարար Վարոս Սիմոնյանը ներկայացրել է Եվրասիական տնտեսական միության 2020-2025թթ. խոշորագույն արդյունաբերական շինարարության ներդրումային ծրագրերի իրականացման ընթացքը Հայաստանի Հանրապետությունում:
Այս մասին տեղեկանում ենք Ազգային ժողովի մամուլի ծառայությունից։
Զեկուցողի խոսքով՝ 2020-ի հուլիսին Եվրասիական միջկառավարական խորհրդի կողմից Եվրասիական տնտեսական հանձնաժողովին ԵԱՏՄ արդյունաբերականացման քարտեզ ստեղծելու հանձնարարական է տրվել: Այն բաղկացած է երեք ուղղությունիցգ առաջին բաժնում ընդգրկված են իրագործվող եւ ծրագրավորվող խոշոր նախագծերը եւ արդյունաբերության համապատասխան ճյուղերի համար կարեւոր նախագծերի մասին տեղեկատվությունը: Քարտեզում ներառված է 21 ճյուղերի վերաբերյալ 178 խոշոր նախագիծ՝ մոտ 200 մլրդ ԱՄՆ դոլարի ներդրումների անհրաժեշտությամբ: Տարվա ավարտին հանձնաժողովը կներկայացնի առաջին հաշվետվությունը: «Քարտեզն առցանց հասանելի է, բոլոր տնտեսվարողները կարող են օգտվել տեղեկատվությունից», -ընդգծել է բանախոսը: Երկրորդ բաժնում ընդգրկված են արդյունաբերության ավելի քան 20 ճյուղերին առնչվող 500-600 տեխնոլոգիական ուղղություն: Երրորդ բաժնում ներառվել են ԵԱՏՄ մաքսային տարածք ներմուծման առավել նշանակալի ծավալով ապրանքային խմբերը:
Ըստ նրա՝ Հայաստանն ունի 4 ազատ տնտեսական գոտի, երեքը ստեղծվել են մասնավոր նախաձեռնությամբ, չորրորդը՝ ԵԱՏՄ շրջանակում Մեղրիի ազատ տնտեսական գոտին է:
Անդրադառնալով ներդրումային ծրագրերի իրականացման ընթացքին՝ փոխնախարարն ասել է, որ որոշ ծրագրերի իրականացման ուղղությամբ ընթանում են քննարկումներ՝ ներգրավվելու ներդրումներ: Վարոս Սիմոնյանը տեղեկացրել է, որ այս պահին Չինաստանում եւ Իրանում մեր երկիրն ունի առեւտրային ներկայացուցիչ:
Զեկուցողը պատասխանել է պատգամավորների հարցերին:
