ՌԴ նախագահ Վլադիմիր Պուտինը Ադրբեջանի նախագահ Իլհամ Ալիևի հետ քննարկել է իրավիճակը Լեռնային Ղարաբաղում և հայ-ադրբեջանական սահմանին:
«Ռուսաստանի Դաշնության Նախագահ Վլադիմիր Պուտինը հեռախոսազրույց է ունեցել Ադրբեջանի Հանրապետության Նախագահ Իլհամ Ալիևի հետ: Լեռնային Ղարաբաղի շուրջ իրավիճակի քննարկումը շարունակվել է` շեշտը դնելով տարածաշրջանում անվտանգության և կայունության ապահովման համար գործնական առաջադրանքների լուծման վրա, որոնք համապատասխանում են 2020 թվականի նոյեմբերի 9-ի և հունվարի 11-ի հայտարարություններին», – ասված է Կրեմլի հայտարարության մեջ:
Այս համատեքստում ուշադրություն է դարձվել վերջերս ադրբեջանա-հայկական սահմանին տեղի ունեցած միջադեպին: Ընդհանուր տրամադրվածությունն այն է, որ կարգավորումը իրականացվի բացառապես քաղաքական և դիվանագիտական մեթոդներով: Ռուսական կողմը կշարունակի միջնորդական ջանքերն ու խորհրդատվական աջակցությունը՝ ուղղված Ադրբեջանի և Հայաստանի միջև համաձայնության գալուն` պետական սահմանի սահմանազատման գործընթացը սկսելու վերաբերյալ:
Պուտինը և Ալիևը մտքեր են փոխանակել նաև երկկողմ օրակարգի կարևոր հարցերի շուրջ: Ադրբեջանի ղեկավարն իր անկեղծ երախտագիտությունն է հայտնել ռուսական պատվաստանյութերի շարունակական մատակարարումների համար:
Նշվում է, որ ղեկավարները երկուստեք հետաքրքրություն են հայտնել բոլոր ոլորտներում փոխշահավետ համագործակցությունը խորացնելու հարցում:
«Կառավարությունների, համապատասխան նախարարությունների և գերատեսչությունների միջև ինտենսիվ շփումներն ուղղված կլինեն դրան», – ամփոփել է Կրեմլը:
