Փաստաբան Կարեն Մեժլումյանը ֆեյսբուքյան իր էջում գրում է․
«Նիկոլ Փաշինյանին իշխանության բերած ժողովրդական շարժումը սկզբում անվանվեց «սիրո և հանդուրժողականության» հեղափոխություն, որը միավորող բնույթի է, այնուհետև այդ բառերը հանվեցին ու փոխարինվեցին այլ բառերով, իսկ իշխանության գալուց հետո Փաշինյանը հասարակությանը բաժանեց սևերի և սպիտակների, որը պառակտող բնույթի է։ Այդտեղից էլ սկսվեց նրա անկումը։
Փաշինյանի հրաժարականն ակտիվ պահանջող 16+ կուսակցությունների նախաձեռնած շարժման որոշ համակիր ակտիվիստներ ու բանախոսներ Փաշինյանի կողմնակիցներին անվանելով ժեխ (աղբ, կեղտ), իրենց հերթին և է՛լ ավելի են հասարակությանը պառակտում ու թշնամացնում, ինչը ասոցացվում է տվյալ շարժման դիրքորոշման հետ։
Դա է պատճառներից մեկը, որ այս շարժումը չի կարողանում հավաքներին բավարար մասնակցություն ապահովել, ինչն էլ շահեկան վիճակի մեջ է դնում Փաշինյանին, քանի որ եռացող կաթսայից գոլորշի բաց թողնելու էֆեկտ ունի։
Կարծում եմ, որ ներկայիս իրավիճակում հեռանկար ունեն համախմբող, այլ ոչ թե պառակտող շարժումները»։
